ព័ត៌មានអន្ដរជាតិ

អាមេរិកដឹកប្រេងឆៅឱ្យហ្វីលីពីន ចំពេលមានវិបត្តិថាមពលដោយសារជម្លោះមជ្ឈិមបូព៌ា

បានផុស

១ ខែ មុន

នៅ

ថ្ងៃព្រហស្បតិ៍ ២៨ ឧសភា ២០២៦

ដោយ

កប៉ាល់ដឹងប្រេងឆៅមួយគ្រឿងពីស្ដុកបម្រុងប្រេងយុទ្ធសាស្ត្ររបស់សហរដ្ឋអាមេរិក (SPR) បានចាកចេញពីឈូងសមុទ្រម៉ិកស៊ិក សំដៅទៅកាន់ប្រទេសហ្វីលីពីន ដែលនេះជាការដឹកជញ្ជូនប្រេងពីស្ដុកបម្រុងរបស់អាមេរិកមកអាស៊ីជាលើកដំបូងរាប់តាំងពីចុងឆ្នាំ ២០២២ ចំពេលវិបត្តិថាមពលនៅអាស៊ីអាគ្នេយ៍បន្តដោយសារតែជម្លោះអាមេរិក-អ៊ីរ៉ង់ ដែលបង្កការបិទខ្ទប់ច្រកហ័មូហ្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានរ៉យទ័របានរាយការណ៍លើបញ្ហានេះ ដោយស្រង់ទិន្នន័យពីក្រុមហ៊ុនតាមដានការដឹកជញ្ជូនតាមសមុទ្រអន្តរជាតិ។ ការដឹកជញ្ជូនប្រេងដ៏កម្ររបស់អាមេរិក បានបង្ហាញជាថ្មីម្តងទៀតអំពីការរៀបចំឡើងវិញនូវលំហូរខ្សែច្រវ៉ាក់ផ្គត់ផ្គត់ថាមពលសកល ដោយសារតែផលរំខាននៅច្រកហ័រមូហ្ស។

មុនពេលសង្គ្រាមអាមេរិក-អ៊ីរ៉ង់ផ្ទុះឡើង អាស៊ីនាំចូលប្រេងឆៅពីមជ្ឈិមបូព៌ារហូតដល់ទៅ ៨០% ហើយក្នុងនោះផងដែរ ហ្វីលីពីនដែលកំពុងប្រឈមមុខនឹងវិបត្តិថាមពល បាននាំចូលប្រេងឆៅភាគច្រើនរបស់ខ្លួនពីអារ៉ាប៊ីសាអូឌីត អ៊ីរ៉ាក់ និងអារ៉ាប់រួម។ ទិន្នន័យពីក្រុមហ៊ុន Kpler បានបង្ហាញថា ប្រទេសអាស៊ីអាគ្នេយ៍មួយនេះ មិនបាននាំចូលប្រេងពីសហរដ្ឋអាមេរិក ចាប់តាំងពីឆ្នាំ ២០២០ មក។

ឥឡូវនេះ កប៉ាល់ដឹកប្រេងបំពាក់ទង់ជាតិក្រិក ឈ្មោះ Arosa កំពុងដឹកជញ្ជូនប្រេងឆៅអាមេរិកជាង ១,៣ លានបារ៉ែល ទៅកាន់ប្រទេសហ្វីលីពីន រួមទាំង ៦១៦ ០០០ បារ៉ែល ពីស្តុកបម្រុងប្រេងយុទ្ធសាស្ត្រSPR។ សហរដ្ឋអាមេរិកក៏កំពុងបញ្ជូនប្រេង SPR ទៅកាន់អឺរ៉ុបផងដែរ ដោយកាត់បន្ថយស្តុកប្រេងគ្រាអាសន្នបន្ថែមទៀត។

គេចាំបានថា រដ្ឋបាលរបស់អតីតប្រធានាធិបតីអាមេរិក លោក ចូ បៃដិន បានបញ្ចេញប្រេងជាង ១៨០ លានបារ៉ែលពី SPR ក្នុងឆ្នាំ ២០២២ បន្ទាប់ពីទណ្ឌកម្មលើរុស្ស៊ី បានធ្វើឱ្យតម្លៃប្រេងសកលឡើងថ្លៃ។ ឥឡូវនេះ រដ្ឋបាលរបស់លោកប្រធានាធិបតី ដូណាល់ ត្រាំ កំពុងបញ្ចេញប្រេងចំនួន ១៧២ លានបារ៉ែល ពី SPR ដើម្បីជាផ្នែកមួយនៃការបញ្ចេញប្រេង ៤០០ លានបារ៉ែលពីស្ដុកយុទ្ធសាស្រ្តរបស់ប្រទេសជាសមាជិកទីភ្នាក់ងារថាមពលអន្តរជាតិ (IEA) ក្នុងបំណងជំរុញលំហូរប្រេងសកលក្រោយច្រកហ័រមូហ្សត្រូវបានបិទ។

យ៉ាងណាមិញ មានការព្រួយបារម្ភកាន់តែខ្លាំងឡើងថា ការបញ្ចេញប្រេងទាំងនេះអាចមិនគ្រប់គ្រាន់ដើម្បីជំនួសការផ្គត់ផ្គង់ពីមជ្ឈិមបូព៌ា ដែលមានចន្លោះពី ១៤-១៥ លានបារ៉ែល/ថ្ងៃ មុនជម្លោះផ្ទុះឡើងនោះទេ។

ទោះយ៉ាងណាក៏ដោយ ការផ្គត់ផ្គង់ទាំងនោះ អាចជួយសម្រួលតម្រូវការពីប្រទេសខ្លះៗដូចជាហ្វីលីពីន ជាដើម។ កន្លងមក ហ្វីលីពីនបានខ្នះខ្នែងដោយស្រាយវិបត្តិថាមពលរបស់ខ្លួន រួចទាំងការកម្រិតការប្រើប្រាស់ប្រេងក្នុងស្រុក ក៏ដូចជាព្យាយាមរកការផ្គត់ផ្គង់ពីប្រភពជំនួស រួមទាំងសហរដ្ឋអាមេរិក រុស្ស៊ី និងចិនជាដើម៕