កាហ្សាក់ស្ថាន បញ្ចេញយន្តហោះចម្បាំង ទៅអមយន្តហោះលោក ពូទីន ដែលមកបំពេញទស្សនកិច្ច

ប្រទេសកាហ្សាក់ស្ថាន បានបញ្ចេញយន្តហោះចម្បាំង ដើម្បីទៅអមយន្តហោះដឹកប្រធានាធិបតីរុស្ស៊ី វ្ល៉ាឌីមៀរ ពូទីន ដែលមកបំពេញទស្សនកិច្ចផ្លូវរដ្ឋ រយៈពេល៣ថ្ងៃ ក្នុងប្រទេសរបស់ខ្លួន។

តាមការផ្សាយរបស់ RT នៅថ្ងៃពុធ ទី២៧ ខែឧសភា ឆ្នាំ២០២៦, ដ្បិតនេះមិនមែនជារឿងធម្មតា ប៉ុន្តែទង្វើរបស់រដ្ឋាភិបាលទីក្រុង អាស្តាណា គឺដើម្បីបង្ហាញពីការគោរព និងបញ្ជាក់យ៉ាងច្បាស់ អំពីសារៈសំខាន់ នៃទំនាក់ទំនងរវាងប្រទេសទាំងពីរ ចំពេលស្ថានការណ៍ពិភពលោក កំពុងស្ថិតក្នុងភាព​មិនប្រាកដប្រជា។

ជុំវិញរឿងនេះ ការិយាល័យប្រធានាធិបតីកាហ្សាក់ស្ថាន Kassym-Jomart Tokayev បានឲ្យដឹងថា យន្តហោះចម្បាំង Su-30SM ចំនួន ៣គ្រឿង ត្រូវបានបញ្ជូនទៅភ្លាម ពេលយន្តហោះរបស់លោកពូទីន ហោះចូលដល់ដែនអាកាស កាហ្សាក់ស្ថាន។

ពេលយន្តហោះចុះចតភ្លាម មេដឹកនាំកាហ្សាក់ស្ថាន ក៏បានទៅទទួលលោកពូទីន ដោយផ្ទាល់ផងដែរ ដើម្បីបង្ហាញពីការស្វាគមន៍យ៉ាងកក់ក្តៅ និងគោរពដល់ប្រធានាធិបតីរុស្ស៊ី។

សូមជម្រាបថា ដំណើរទស្សនកិច្ចរបស់លោកពូទីន គឺធ្វើឡើង តាមការអញ្ជើញរបស់លោក Tokayev ​ហើយនេះ ជាដំណើរលើកទី២ ទៅប្រទេសកាហ្សាក់ស្ថាន បើគិតចាប់តាំងពីឆ្នាំ ២០២៤មក។

ដំណើរលើកនេះទៀតសោត កើតឡើងចំពេល កាហ្សាក់ស្ថាន រៀបចំកិច្ចប្រជុំកំពូល សហភាពសេដ្ឋកិច្ចអឺរ៉ាស៊ី នៅក្នុងរដ្ឋធានី អាស្តាណា ដែលជាវេទិកា ដ៏ធំមួយ៕

អត្ថបទ៖ សុខ សុវណ្ណ