អាជ្ញាធរខណ្ឌជ្រោយចង្វារ បន្តចុះពិនិត្យកន្លែងស្នាក់នៅ ជនបរទេស ដើម្បីបោសសម្អាតបទល្មើសឆបោកតាមប្រព័ន្ធបច្ចេកវិទ្យា

គណៈបញ្ជារឯកខណ្ឌជ្រោយចង្វារ បានដឹកនាំកម្លាំងចម្រុះចុះពិនិត្យតាមទីតាំងអាគារស្នាក់នៅ ជនបរទេសក្នុងខណ្ឌជ្រោយចង្វារ ដើម្បីបោសសម្អាតទីតាំងសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា Online Scams អោយអស់ពីមូលដ្ឋានខណ្ឌ។

អនុវត្តតាមបទបញ្ជា និងការចង្អុលបង្ហាញដោយផ្ទាល់ពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ នៅថ្ងៃទី៣ ខែមិថុនា ឆ្នាំ២០២៦ គណៈបញ្ជាការឯកភាពខណ្ឌជ្រោយចង្វារ ដឹកនាំដោយលោក លីម សុភា អភិបាលខណ្ឌជ្រោយចង្វារ រួមជាមួយលោកអធិការខណ្ឌ មេបញ្ជាការកងរាជអាវុធហត្ថខណ្ឌ និងមន្ត្រីពាក់ព័ន្ធ បានចុះត្រួតពិនិត្យរដ្ឋបាល និង អនុវត្តប្រតិបត្តិការបោសសម្អាតទីតាំងសង្ស័យពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams) នៅទីតាំងអាគារខុនដូ Galaxy ស្ថិតនៅភូមិ៣ សង្កាត់ជ្រោយចង្វារ ខណ្ឌជ្រោយចង្វារ។

ប្រតិបត្តិការនេះ ក្រុមការងារបានចុះត្រួតពិនិត្យទីតាំង ខុនដូ Galaxy  ដោយកម្លាំងអាជ្ញាធរចម្រុះបានធើ្វការចុះត្រួតពិនិត្យសរុបចំនួន ៥៨ បន្ទប់ និងពិនិត្យឯកសាររបស់ជនបរទេសស្នាក់នៅចំនួន ១៨ នាក់ ដែលមានឯកសារត្រឹមត្រូវតាមច្បាប់។ ក្នុងនោះការចុះរដ្ឋបាលពិនិត្យតាមទីតាំងអាគារស្នាក់នៅខាងលើនេះ អាជ្ញាធរពុំបានរកឃើញសម្ភារៈ ឬសកម្មភាពណាមួយដែលគួរឱ្យសង្ស័យ ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams) ឬបទល្មើសផ្សេងៗឡើយ។

ជាមួយគ្នាផងដែរ រដ្ឋបាលខណ្ឌជ្រោយចង្វារ នឹងបន្តពង្រឹងការត្រួតពិនិត្យ និងអនុវត្តវិធានការច្បាប់ជាបន្តបន្ទាប់ ដើម្បីធានាសន្តិសុខ សុវត្ថិភាព និងសណ្តាប់ធ្នាប់សាធារណៈ និង បោសសម្អាតទីតាំងសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា Online Scams អោយអស់ពីមូលដ្ឋានខណ្ឌ៕អត្ថបទ ៖ អុឹងម៉េង