អ៊ីរ៉ង់ អាចដឹក​ប្រេង​លក់​វិញភ្លាមៗ ក្រោយចុះកិច្ចព្រមព្រៀងបញ្ចប់សង្គ្រាម

មន្ត្រីជាន់ខ្ពស់ម្នាក់របស់សហរដ្ឋអាមេរិក បានបង្ហើប​ប្រាប់​ទីភ្នាក់ងារ​ព័ត៌មានរ៉យទ័រ កាល​ពី​ថ្ងៃទី​១៦ ខែមិថុនា ​ថា រដ្ឋាភិបាល​ក្រុង​វ៉ាស៊ីនតោន នឹងអនុញ្ញាតឱ្យប្រទេសអ៊ីរ៉ង់ចាប់ផ្តើមលក់ប្រេង និងឥន្ធនៈឡើងវិញភ្លាមៗ ស្របតាមអនុស្សរណៈនៃការយោគយល់គ្នា (MOU) ដែលភាគីទាំងពីរបានព្រមព្រៀងគ្នា ដើម្បីបញ្ចប់សង្គ្រាម។

ការបើកផ្លូវនេះ គឺជាជំហានវិជ្ជមានថ្មីមួយ ក្នុងការសម្រាលសម្ពាធសេដ្ឋកិច្ច និងនយោបាយដែលបានអូសបន្លាយនា​ពេលកន្លងមក។ ប្រភពដដែល បានពន្យល់ថា លក្ខខណ្ឌនៃការលើកលែងទណ្ឌកម្មលើការលក់ប្រេងរបស់អ៊ីរ៉ង់នេះ នឹងចាប់ផ្តើមមានប្រសិទ្ធភាពភ្លាមៗនៅពេលដែលកិច្ចព្រមព្រៀងត្រូវបានចុះហត្ថលេខានៅក្នុងសប្តាហ៍នេះ។ បន្ថែម​ពី​នោះ ការលើកលែងទណ្ឌកម្ម ក៏នឹងគ្របដណ្តប់ទៅលើសេវាកម្មសំខាន់ៗផ្សេងទៀតផងដែរ រួមមាន ប្រព័ន្ធធនាគារ វិស័យដឹកជញ្ជូន និងធានារ៉ាប់រង ដើម្បីធ្វើឱ្យដំណើរការទិញលក់ប្រេងនេះអាចប្រព្រឹត្តទៅបានដោយរលូន និងគ្មានឧបសគ្គ។

យ៉ាង​ណាមិញ មន្ត្រីអាមេរិករូបនេះ បានសង្កត់ធ្ងន់ថា កិច្ចព្រមព្រៀង មិនមែនជាការផ្តល់ឱ្យទទេៗនោះទេ ពោលគឺវាមានលក្ខខណ្ឌចងកាតព្វកិច្ចយ៉ាងតឹងរ៉ឹង។ លក្ខខណ្ឌនោះគឺ អ៊ីរ៉ង់អាចទទួលបានអត្ថប្រយោជន៍ទាំងអស់នេះទៅបាន លុះត្រាតែពួកគេគោរពតាមរាល់ចំណុច ដែលបានព្រមព្រៀងគ្នាដាច់ខាត ដែលក្នុងនោះរួមមាន ការមិនបង្កើតអាវុធនុយក្លេអ៊ែរ ការកម្ទេចចោលនូវសារធាតុចម្រាញ់អ៊ុយរ៉ាញ៉ូម និងការមិនចូលទៅជ្រៀតជ្រែក ឬរារាំងដល់ការធ្វើនាវាចរណ៍ដោយសេរីនៅក្នុងច្រកសមុទ្រហ័រមូស៕

ប្រែសម្រួល៖ ឈាង