ផ្លូវ​បេតុង​ប្រវែងជាង ១៣ គីឡូម៉ែត្រ សាងសង់​តភ្ជាប់ ៥ ភូមិ ​សម្រួល​ការ​ធ្វើដំណើរ​ពលរដ្ឋ​រស់នៅ​លើខ្នងភ្នំគូលែន

ផ្លូវបេតុង ១ ខ្សែ មានប្រវែង ១៤,៤៣ គ.ម កំពុងត្រូវបាន​សាងសង់​តភ្ជាប់ភូមិចំនួន ៥ នៅ​តំបន់ទេសចរណ៍វប្បធម៌ និងធម្មជាតិភ្នំគូលែន។

ផ្លូវ​បេតុងដែលកំពុង​សាងសង់នេះ​​មានឈ្មោះ ព្រះអង្គធំ-សង្កែឡាក់ មានប្រវែង ១៤,៤៣គ.ម ទទឹង ៣ ម៉ែត្រ តភ្ជាប់ភូមិចំនួន ៥ គឺភូមិព្រះអង្គធំ ភូមិពពេល ភូមិខ្លាឃ្មុំ ភូមិសង្កែឡាក់ និងភូមិតាពេញ ក្នុងឃុំខ្នងភ្នំ ស្រុកស្វាយលើ។

លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ខណៈ​​ចុះពិនិត្យវឌ្ឍនភាពគម្រោងស្ថាបនាផ្លូវ​បាន​បញ្ជាក់ថា ផ្លូវ​បេតុងកំពុង​សាងសង់​នៅខ្នងភ្នំគូលែន​ នឹង​ផ្ដល់ផលប្រយោជន៍ដោយប្រយោលដល់ប្រជាពលរដ្ឋចំនួន ១ ២៣៧ គ្រួសារ ស្មើនឹង ៥ ៣៧០នាក់។

ខ្សែផ្លូវនេះរំពឹងថានឹងបម្រើដល់ភ្ញៀវទេសចរគ្រប់ប្រភេទ ជាពិសេសអ្នកថ្មើរជើង អ្នកជិះកង់ ឬម៉ូតូកម្សាន្តទៅទីតាំងនានាក្នុងតំបន់ទេសចរណ៍វប្បធម៌ និងធម្មជាតិភ្នំគូលែន។ លោកបន្ថែម។

ខ្សែផ្លូវនេះបាន​ចាប់ផ្តើមសាងសង់នៅខែកញ្ញា ឆ្នាំ២០២៥ បច្ចុប្បន្នសម្រេចវឌ្ឍនភាពប្រមាណ ៥១% ហើយ​គ្រោងនឹងបញ្ចប់ការងារសាងសង់នៅក្នុងខែធ្នូ ឆ្នាំ២០២៦ ដែល​អនុវត្តដោយក្រសួងអភិវឌ្ឍន៍ជនបទ ក្នុងក្របខ័ណ្ឌគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា (CSLEP) ដោយប្រើប្រាស់ហិរញ្ញប្បទានសហប្រតិបត្តិការពីធនាគារពិភពលោក (WB)។

ក្នុងឱកាសពិនិត្យការដ្ឋានផ្ទាល់ លោក​រដ្ឋមន្ត្រីបាន​ណែនាំ​ដល់ទីប្រឹក្សាបច្ចេកទេស និងអ្នកទទួលការសាងសង់ ត្រូវអនុវត្តឱ្យបានត្រឹមត្រូវតាមបទដ្ឋានបច្ចេកទេស។

គួរ​បញ្ជាក់ថា គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជាអនុវត្តដោយក្រសួងចំនួន ០២ គឺ ក្រសួងបរិស្ថាន និងក្រសួងអភិវឌ្ឍន៍ជនបទ ដែលមានគោលបំណងធ្វើឱ្យប្រសើរទ្បើងនូវការ​គ្រប់​គ្រងតំបន់ការពារធម្មជាតិ ជំរុញឱកាសសម្រាប់ការអភិវឌ្ឍទេសចរណ៍ធម្មជាតិ និងការគ្រប់គ្រងបរិស្ថាន៕