ព័ត៌មានជាតិ

ការផ្តល់អាជ្ញាបណ្ណអាជីវកម្មបូមខ្សាច់តាមដងទន្លេ ឆ្លងកាត់ការវាយតម្លៃពីរដំណាក់កាលធំៗ ទើបអាចដំណើរការបាន

បានផុស

១ ថ្ងៃ មុន

នៅ

ថ្ងៃអង្គារ ៧ កក្កដា ២០២៦

ដោយ

ការផ្តល់អាជ្ញាបណ្ណអាជីវកម្មបូមខ្សាច់តាមដងទន្លេ ស្ទឹង ព្រែក ត្រូវឆ្លងកាត់ការសិក្សាវាយតម្លៃពីស្ថាប័នជំនាញ រួមទាំងការពិគ្រោះយោបល់ជាមួយអាជ្ញាធរនិងពលរដ្ឋក្នុងមូលដ្ឋាន តាមរយៈការបើកវេទិកាសាធារណៈដើម្បីស្វែងរកពីផលប៉ះពាល់ដល់សង្គមបរិស្ថាន។

ថ្លែងនៅក្នុងសន្និសីទសារព័ត៌មានលេីការងារអាជីវកម្មរ៉ែខ្សាច់ កាលពីថ្ងៃទី ៥ ខែកក្កដា ឆ្នាំ២០២៦ លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពលបានពន្យល់អំពីដំណើរការនីតិវិធីនៃការផ្ដល់អាជ្ញាបណ្ណ សម្រាប់អាជីវកម្មបូមខ្សាច់តាមទន្លេ ស្ទឹង និងព្រែក នៅក្នុងប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា នីតិវិធីដើម្បីទទួលបានអាជ្ញាបណ្ណសម្រាប់ការធ្វើអាជីវកម្មខ្សាច់តាមដងទន្លេ ស្ទឹង ឬព្រែក ត្រូវឆ្លងកាត់ការវាយតម្លៃសិក្សា ២ ដំណាក់កាលធំៗ។

សម្រាប់ដំណាក់កាលទី ១ ក្រសួងរ៉ែ និងថាមពល ត្រូវធ្វើការវាយតម្លៃលើចំណុចសំខាន់ៗចំនួន ២៖

១. វាយតម្លៃគុណវុឌ្ឍិរបស់ក្រុមហ៊ុន៖ ពិនិត្យមើលថាតើក្រុមហ៊ុនមានសមត្ថភាព និងលក្ខខណ្ឌគ្រប់គ្រាន់ក្នុងការធ្វើប្រតិបត្តិការអាជីវកម្មខ្សាច់នេះដែរឬទេ។
២. វាយតម្លៃលើឯកសារសិទ្ធិ និងទីតាំង៖ ពិនិត្យមើលទីតាំងដែលក្រុមហ៊ុនស្នើសុំ ជៀសវាងការជាន់លើទីតាំងអាជ្ញាបណ្ណរបស់អ្នកដទៃ ឬស្ថិតនៅក្នុងតំបន់ហាមឃាត់ (តំបន់ក្រហម) របស់ក្រសួង។

បន្ទាប់ពីការវាយតម្លៃបឋមឃើញថាសមស្រប ក្រសួងនឹងបញ្ជូនក្រុមការងារចុះបេសកកម្មផ្ទាល់ ដើម្បីពិនិត្យបន្ថែមលើ៖

-ធនធានខ្សាច់៖ ពិនិត្យថាតើតំបន់នោះមានខ្សាច់ពិតប្រាកដដែរឬទេ។
-ផលប៉ះពាល់៖ វាយតម្លៃផលប៉ះពាល់លើការរកស៊ីផ្សេងៗ (ឧទាហរណ៍តំបន់រីសត/Resort) បញ្ហាបាក់ច្រាំង និងផលប៉ះពាល់លើផ្លូវថ្នល់ ស្ពាន ក៏ដូចជាការរស់នៅរបស់ប្រជាពលរដ្ឋ និងនេសាទ។

ក្រោយបញ្ចប់ដំណាក់កាលទី ១ លោក អ៊ឹង ឌីប៉ូឡា បានបន្តថា គឺឈានទៅដំណាក់កាលទី២ ដើម្បីសិក្សាបច្ចេកទេស និងការវាយតម្លៃផលប៉ះពាល់ ដោយមានការចូលរួមសិក្សាពីអន្តរក្រសួង។

លោកថា បន្ទាប់ពីក្រសួងវាយតម្លៃជំហានដំបូងឃើញថាលទ្ធភាពអាចទៅរួច ក្រុមហ៊ុនត្រូវបន្តអនុវត្តការសិក្សាលម្អិតជាមួយក្រសួង-ស្ថាប័នជំនាញពាក់ព័ន្ធផ្សេងទៀត ក្នុងនោះមានក្រសួងធនធានទឹក និងឧតុនិយម ក្នុងការសិក្សាផ្នែកជលវិទ្យា ដើម្បីសិក្សាលម្អិតពីលំហូរទឹក ល្បឿនទឹក ជម្រៅដែលត្រូវបូម និងកម្រាស់ខ្សាច់ដែលអាចបូមបាន ដើម្បីធានាបច្ចេកទេសមិនឱ្យមានការបាក់ច្រាំង។

ដោយឡែក ពាក់ព័ន្ធការវាយតម្លៃហេតុប៉ះពាល់បរិស្ថាន (EIA) ត្រូវបានបែងចែកជា ៣ កម្រិត ផ្អែកលើទំហំផ្ទៃដីជាក់ស្តែង៖

-ទំហំតូចជាង ១០ ហិកតា តម្រូវឱ្យធ្វើត្រឹមតែកិច្ចសន្យាការពារបរិស្ថាន ដែលចេញដោយក្រសួងបរិស្ថាន។
-ទំហំពី ១០ ទៅ ៤០ ហិកតា តម្រូវឱ្យមានការវាយតម្លៃហេតុប៉ះពាល់បរិស្ថានបឋម (IEIA)។
-ទំហំធំជាង ៤០ ហិកតា តម្រូវឱ្យធ្វើការសិក្សា វាយតម្លៃហេតុប៉ះពាល់បរិស្ថានពេញលេញ (EIA)។

បន្ថែមពីនេះ លោក អ៊ឹង ឌីប៉ូឡា បានបញ្ជាក់ថា ការចាប់ផ្តើមដំណើរការអាជីវកម្មទៅបាន ក៏ត្រូវមានការពិគ្រោះយោបល់ជាមួយអាជ្ញាធរនិងប្រជាជនក្នុងមូលដ្ឋាន តាមរយៈការរៀបចំវេទិកាសាធារណៈ។ ប្រសិនបើពលរដ្ឋភាគច្រើនមិនឯកភាពទេ អាជីវកម្មខ្សាច់នោះក៏មិនអាចដំណើរការបានដែរ ទោះបីជាមានការយល់ព្រមពីបណ្តាក្រសួងនានាក៏ដោយ។

ក្រោយដំណើរការនីតិវិធីសិក្សាបញ្ចប់រួមទាំងបានការគាំទ្រពីពលរដ្ឋ ក្រុមហ៊ុនអាចដាក់ពាក្យស្នើសុំអាជ្ញាបណ្ណជាផ្លូវការ ដោយអាជ្ញាបណ្ណមានសុពលភាព ២ ឆ្នាំ ហើយត្រូវបន្តរៀងរាល់ ២ ឆ្នាំម្តង។

បើតាមមន្រ្តីក្រសួងរ៉ែ និងថាមពល គិតមកដល់ពេលនេះ ក្រសួងបានផ្តល់អាជ្ញាបណ្ណខ្សាច់តាមទន្លេ ស្ទឹង និងព្រែកសរុបមានចំនួន ៩៣ អាជ្ញាបណ្ណ ក្នុងនោះតាមដងទន្លេមេគង្គមានចំនួន ៥៥ ទន្លេបាសាក់ចំនួន ៧ ទន្លេសេសានចំនួន ៤ ទន្លេស្រែពកចំនួន ៤ និងទន្លេសេកុងចំនួន ៣។

តាមដងស្ទឹងសរុបមានចំនួន ៨ អាជ្ញាបណ្ណ ក្នុងនោះស្ទឹងព្រែកត្នោតមានចំនួន ៤ ស្ទឹងស្រែបាក់មានចំនួន ១ ស្ទឹងតាសាលមានចំនួន ១ ស្ទឹងពោធិ៍សាត់ចំនួន ១ និងស្ទឹងអារ៉ែងចំនួន ១។

តាមព្រែក និងមាត់ពាមសមុទ្រសរុប ១២ អាជ្ញាបណ្ណ ក្នុងនោះតាមមាត់ពាម (មាត់ព្រែក/មាត់សមុទ្រ) ចំនួន ៤ និងនៅក្នុងព្រែកមានចំនួន ៨ អាជ្ញាបណ្ណ។

លោក អ៊ឹង ឌីប៉ូឡា បានបញ្ជាក់ថា អាជ្ញាបណ្ណតាមដងព្រែកនិងមាត់ពាមសមុទ្រ ភាគច្រើនគឺស្ថិតនៅក្នុងតំបន់ខេត្តកោះកុង៕