ព័ត៌មានជាតិ

រដ្ឋាភិបាលនឹងកំណត់តំបន់ Zoning លែងឲ្យមានការដ្ឋានវាយថ្មរកេតរកូតតទៅទៀត

បានផុស

១៧ នាទី មុន

នៅ

ថ្ងៃអង្គារ ៧ កក្កដា ២០២៦

ដោយ

ក្នុងសន្និសីទសារព័ត៌មានពីវិស័យរ៉ែ កាលពីថ្ងៃទី៥ ខែកក្កដា ឆ្នាំ២០២៦ មន្រ្តីក្រសួងរ៉ែនិងថាមពលបានលើកឡើងពីការដាក់ចេញនូវគោលនយោបាយរបស់រដ្ឋាភិបាល ក្នុងការកំណត់តំបន់ «Zoning» ដើម្បីគ្រប់គ្រងអាជីវកម្មរ៉ែថ្មសំណង់ ដោយបែងចែកតំបន់ដែលអនុញ្ញាតឱ្យធ្វើអាជីវកម្មបន្ត និងតំបន់ដែលត្រូវតែបញ្ឈប់។

លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពលបានឲ្យដឹងថា ការកំណត់តំបន់ (Zoning) គឺដើម្បីធានាឱ្យមានតុល្យភាពរវាង ការអភិវឌ្ឍ និងការអភិរក្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«ចាប់ពីឆ្នាំក្រោយ ឬ ២ ទៅ ៣ ឆ្នាំខាងមុខទៀត បងប្អូនប្រជាពលរដ្ឋនឹងលែងឃើញមានការដ្ឋានវាយថ្មរកេតរកូត ឬរញ៉េរញ៉ៃតាមដងផ្លូវនានាទៀតហើយ»។

បន្ថែមពីនេះ មន្រ្តីក្រសួងរ៉ែ និងថាមពលក៏បានបកស្រាយជុំវិញចម្ងល់ «ហេតុអ្វីបានជាមានការដ្ឋាននៅតាមផ្លូវ?» ដោយលោកពន្យល់ប្រៀបធៀបពីស្ថានភាពពីអតីតកាលដូចជាករណីផ្លូវជាតិលេខ ៤១ ឬផ្លូវ Highway ទៅកំពង់សោមជាដើម កាលដែលក្រសួងផ្តល់អាជ្ញាបណ្ណដំបូងគឺមិនទាន់មានផ្លូវថ្នល់ ឬមិនទាន់មានប្រជាពលរដ្ឋមករស់នៅឡើយទេ ពោលគឺនៅក្នុងព្រៃជ្រៅ។

នៅពេលដែលផ្លូវថ្នល់ និងប្រព័ន្ធអគ្គិសនីត្រូវបានស្ថាបនាឡើង ព្រមទាំងមានប្រជាពលរដ្ឋមករស់នៅ ទើបឃើញថាមានការដ្ឋាននៅជិតផ្លូវ។ ដូច្នេះហើយ ទើបបច្ចុប្បន្នក្រសួងត្រូវរៀបចំដកចេញវិញតាមរយៈវិធានការ Zoning នេះ។

ក្នុងសន្និសីទសារព័ត៌មាន លោក អ៊ឹង ឌីប៉ូឡា បានលើកឡើងពីវិធានការការពារតំបន់អភិរក្ស និងតំបន់ទេសចរណ៍។ ជាក់ស្តែងតំបន់ព្រៃឡង់ គឺក្រសួងនឹងមិនចេញអាជ្ញាបណ្ណថ្មីឱ្យទៀតនោះទេ ខណៈភ្នំកំពង់ត្រាចក៏នឹងត្រូវរៀបចំ និងប្រែក្លាយទៅជាតំបន់អេកូទេសចរណ៍ សាសនា និងវប្បធម៌។

«គ្មានប្រតិបត្តិការ ឬសកម្មភាពរ៉ែណាមួយត្រូវបានអនុញ្ញាតឱ្យដំណើរការដោយគ្មានការវាយតម្លៃផលប៉ះពាល់បរិស្ថាននោះឡើយ។ សម្រាប់សកម្មភាពរ៉ែណាដែលពាក់ព័ន្ធនឹងទន្លេ គឺត្រូវមានការវាយតម្លៃផលប៉ះពាល់យ៉ាងលម្អិត រហូតដល់ការសិក្សាអំពីជលវិទ្យានៃប្រព័ន្ធទឹកទន្លេថែមទៀតផង»។ លោកបន្ថែម។

បើតាមលោក អ៊ឹង ឌីប៉ូឡា ការដាក់ចេញវិធានការទាំងនេះធ្វើឡើងក្នុងគោលបំណងរៀបចំសណ្តាប់ធ្នាប់អាជីវកម្មរ៉ែឡើងវិញ ការពារបរិស្ថាន និងធានាថាការអភិវឌ្ឍសេដ្ឋកិច្ចមិនជះឥទ្ធិពលអវិជ្ជមានដល់តំបន់វប្បធម៌ សាសនា និងជីវភាពរស់នៅរបស់ប្រជាពលរដ្ឋឡើយ៕

បន្តចុចអាន៖ រដ្ឋមន្រ្តីក្រសួងរ៉ែ បញ្ជាឲ្យផ្អាកចេញអាជ្ញាប័ណ្ណវាយថ្មសំណង់ ក្នុងកិច្ចការពារធនធានធម្មជាតិ