​​លោក ពូទីន អះអាងថា សត្រូវព្យាយាមបំផ្លាញសេដ្ឋកិច្ច តែប្រព័ន្ធថាមពល រុស្ស៊ី នៅតែរឹងមាំបំផុតក្នុងលោក

ទីភ្នាក់ងារសារព័ត៌មាន Reuters បានរាយការណ៍ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចេញមុខអះអាងកាលពីថ្ងៃទី៨ ខែកក្កដា ថា ប្រព័ន្ធថាមពលរបស់រុស្ស៊ី គឺជាប្រព័ន្ធមួយក្នុងចំណោមប្រព័ន្ធដែលរឹងមាំបំផុតនៅលើពិភពលោក ទោះបីជាមានការប៉ុនប៉ងបំផ្លិចបំផ្លាញសេដ្ឋកិច្ចជាតិ ពីសំណាក់សត្រូវយ៉ាងណាក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងការពារខ្លួនរបស់មេដឹកនាំរុស្ស៊ីរូបនេះ ធ្វើឡើងស្របពេលដែលឧបនាយករដ្ឋមន្ត្រីរុស្ស៊ី លោក អាឡិចសាន់ឌឺ ណូវ៉ាក (Alexander Novak) បានប្រកាសដាក់ចេញនូវវិធានការណ៍បន្ទាន់មួយ ដោយហាមឃាត់ការនាំចេញប្រេងម៉ាស៊ូតទាំងអស់ និងចាប់ផ្តើមនាំចូលប្រេងឥន្ធនៈពីបរទេសមកវិញនៅក្នុងខែកក្កដានេះ ដើម្បីដោះស្រាយវិបត្តិខ្វះខាតប្រេងសាំង និងប្រេងម៉ាស៊ូតដែលកំពុងរីករាលដាលនៅតាមស្ថានីយចាក់ប្រេងទូទាំងប្រទេស។

លោក ពូទីន បានសង្កត់ធ្ងន់នៅក្នុងកិច្ចប្រជុំរដ្ឋាភិបាលថា «វាជារឿងច្បាស់ណាស់ដែលសត្រូវកំពុងព្យាយាមបង្កការខូចខាតដល់សេដ្ឋកិច្ចរបស់យើង និងព្យាយាមបង្កើតស្ថានភាពតានតឹងនៅក្នុងសង្គម។ ប៉ុន្តែយើងដឹងច្បាស់ថា ការប៉ុនប៉ងរបស់ពួកគេគឺមិនអាចទៅរួចនោះឡើយ»។

ទោះបីជាមានការលើកឡើងប្រកបដោយទំនុកចិត្តពីលោក ពូទីន ក៏ដោយ ប៉ុន្តែក្រុមអ្នកវិភាគអន្តរជាតិបានចង្អុលបង្ហាញថា ការសម្រេចចិត្តបិទការនាំចេញប្រេងម៉ាស៊ូត ដែលជាប្រភពចំណូលដ៏ធំមួយរបស់រុស្ស៊ី គឺស្តែងឲ្យឃើញពីសម្ពាធដ៏ធ្ងន់ធ្ងរនៃសង្គ្រាម។

ជាក់ស្ដែង ការប្រកាសបិទការនាំចេញ និងបញ្ជាឲ្យនាំចូលប្រេងនៅក្នុងខែកក្កដានេះ គឺជាវិធានការចុងក្រោយរបស់រុស្ស៊ី ដើម្បីទប់ទល់នឹងវិបត្តិថាមពលក្នុងស្រុក កុំឲ្យស្ថានការណ៍ក្នុងសង្គមកាន់តែជ្រួលច្របល់ ខណៈសេចក្តីថ្លែងការណ៍របស់លោក ពូទីន ត្រូវបានគេមើលឃើញថា ជាការប៉ុនប៉ងសម្រួលអារម្មណ៍ប្រជាពលរដ្ឋ និងបង្ហាញជំហររឹងមាំមិនចុះចាញ់ចំពោះមុខសត្រូវតែប៉ុណ្ណោះ។

ចាប់តាំងពីដើមឆ្នាំ២០២៤ រហូតមកដល់ពាក់កណ្តាលឆ្នាំ២០២៦ នេះ វិស័យថាមពលរុស្ស៊ីបានក្លាយជាផ្ទាំងស៊ីបដ៏សំខាន់។ កងទ័ពអ៊ុយក្រែន បានប្រើប្រាស់ដ្រូនអត្តឃាតរយៈចម្ងាយឆ្ងាយ ហោះចូលទៅវាយប្រហារទ្រង់ទ្រាយធំជាបន្តបន្ទាប់លើ រោងចក្រចម្រាញ់ប្រេង និង ឃ្លាំងផ្ទុកប្រេង សំខាន់ៗជាច្រើនកន្លែង ដែលស្ថិតនៅជ្រៅក្នុងទឹកដីរុស្ស៊ី ដែលធ្វើឲ្យសមត្ថភាពចម្រាញ់ប្រេងរបស់រុស្ស៊ីធ្លាក់ចុះយ៉ាងគំហុក៕

អត្ថបទ ៖ សាង ស្រីល័ក្ខ