ព័ត៌មានអន្ដរជាតិ

ប្អូនស្រីបង្កើតរបស់អតីតព្រឹទ្ធសមាជិក Lindsey Graham ត្រូវតែងតាំងជំនួសបងប្រុស

បានផុស

១៤ វិនាទី មុន

នៅ

ថ្ងៃអង្គារ ១៤ កក្កដា ២០២៦

ដោយ

លោកស្រី Darline Graham Nordone ដែលត្រូវជាប្អូនស្រី ត្រូវបានតែងតាំងឲ្យចូលកាន់តំណែងជំនួសបង ដែលជាអតីតព្រឹទ្ធសមាជិក Lindsey Graham ដែលទើបទទួលមរណភាពកាលពីចុងសប្តាហ៍នេះ និងកំពុងស្ថិតនៅក្នុងការស៊ើបអង្កេតរកជាតិពុលជុំវិញការស្លាប់ដ៏គួរឲ្យសង្ស័យ។

លោកស្រី Darline Graham Nordone ដែលត្រូវជាប្អូនស្រី របស់អតីតព្រឹទ្ធសមាជិក Lindsey Graham។ Tim Scott

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរ៉យទ័រ បានរាយការណ៍ថា អភិបាលរដ្ឋ South Carolina លោក Henry McMaster មកពីគណបក្សសាធារណរដ្ឋ នៅថ្ងៃទី១៣ ខែកក្កដា បានតែងតាំងលោកស្រី Darline Graham Nordone បំពេញកៅអីព្រឹទ្ធសភាដែលទំនេររបស់លោក Graham រហូតដល់សប្តាហ៍ដំបូងនៃខែមករា ឆ្នាំ២០២៧។

លោកស្រី Darline Graham Nordone ដែលប្រធានាធិបតីអាមេរិក លោក ដូណាល់ ត្រាំ បានតែងតាំងជាជម្រើសដែលលោកពេញចិត្តសម្រាប់តំណែងនេះ ត្រូវបានគេរំពឹងថា នឹងស្បថចូលកាន់តំណែងនៅសប្តាហ៍នេះ ដែលអនុញ្ញាតឱ្យលោក John Thune មេដឹកនាំភាគច្រើនរក្សាសំឡេងភាគច្រើន ៥៣-៤៧ របស់គណបក្សសាធារណរដ្ឋនៅក្នុងព្រឹទ្ធសភា។

ការស្លាប់ភ្លាមៗរបស់ លោក Lindsey Graham វ័យ៧១ឆ្នាំ បានកើតឡើងមិនយូរប៉ុន្មានបន្ទាប់ពីលោកបានវិលត្រឡប់មកទីក្រុងវ៉ាស៊ីនតោនវិញពីដំណើរទស្សនកិច្ចទៅកាន់ប្រទេសអ៊ុយក្រែន។ មរណភាពនោះ បានបង្កើតឲ្យមានការសង្ស័យ និងការស៊ើបអង្កេតដ៏ទូលំទូលាយមួយ ហើយ សូម្បីតែសំបុត្រមរណភាពរបស់ព្រឹទ្ធសមាជិករូបនេះក៏ត្រូវបានដាក់ឲ្យនៅក្នុងការរង់ចាំចុះបញ្ជីដែរ។

រ៉យទ័រ បានរាយការណ៍ថា ព្រឹទ្ធសភាអាមេរិកបានបើកសម័យប្រជុំនៅថ្ងៃទី១៣ ខែកក្កដា ជាមួយនឹងតុរបស់លោក Graham ដែលគ្របដណ្ដប់ដោយពណ៌ខ្មៅ ជាមួយនឹងថូផ្កាពណ៌សនៅលើតុនោះ ដើម្បីបង្ហាញនូវការកាន់ទុក្ខដ៏ក្រៀមក្រំនេះ។

ដោយសារលោក McConnell អវត្តមានដោយគ្មានកំណត់ដោយសារតែជំងឺ និងកៅអីរបស់លោក Graham ទំនេរជាបណ្តោះអាសន្ន សមាជិកសភាសាធារណរដ្ឋបានបាត់បង់សមាជិកពីរនាក់ ដែលធ្វើឲ្យវាមានសំឡេងភាគច្រើនអប្បបរមា ៥១ អាសនៈ ដែលអាចបង្កើតឧបសគ្គសម្រាប់លោក Thune ខណៈពេលដែលគាត់កំពុងស្វែងរកការអនុម័តច្បាប់គោលនយោបាយការពារជាតិសំខាន់ៗ និងសេចក្តីព្រាងច្បាប់ទណ្ឌកម្មថ្មីលើប្រទេសរុស្ស៊ី។

ការជំនួសតំណែងបងប្រុសរបស់លោកស្រី Nordone ត្រូវបានប្រកាសឲ្យដឹងនៅក្នុងសន្និសីទសារព័ត៌មានមួយនៅទីក្រុង Columbia រដ្ឋធានីនៃរដ្ឋ South Carolina។ លោកស្រី នឹងបំពេញអាណត្តិរបស់ លោក Graham រហូតដល់បញ្ចប់នៅសប្តាហ៍ដំបូងនៃខែមករា ឆ្នាំ ២០២៧ នៅពេលដែលសភាថ្មីនឹងត្រូវស្បថចូលកាន់តំណែង៕

រ៉ាន់ រើយ