ចំនួនអ្នកស្លាប់ដោយកូវីដតាមតំបន់នៅ ឥណ្ឌា ខុសគ្នាច្រើនពេក មន្ត្រីប៉ូលិសតាមក្រុងចុះទៅស្រង់ទិន្នន័យដល់កន្លែងបញ្ចុះសពដោយខ្លួនឯង

ប៉ូលិសក្រុងដេលីនិយាយថា មានភាពខុសគ្នាយ៉ាងខ្លាំង រវាងស្ថិតិអំពីការស្លាប់ដោយជំងឺកូវីដ ១៩ ដែលប្រមូលបានពីកន្លែងបូជា នៅទីក្រុងឥណ្ឌា និងទិន្នន័យដែលបង្ហាញដោយរដ្ឋាភិបាលរដ្ឋ ។

មន្រ្តីប៉ូលិសជាន់ខ្ពស់នៃទីក្រុងដេលី បានប្រាប់ Sputnik ក្នុងលក្ខខណ្ឌអនាមិកថា កាលពីដើមខែនេះ ពួកគេត្រូវបានដឹកនាំដោយរដ្ឋាភិបាលសហព័ន្ធ ដើម្បីទទួលបានទិន្នន័យស្តីពីការបូជាសព និងការបញ្ចុះសពអ្នកជំងឺកូវីដ និងអ្នកជំងឺធម្មតា ដើម្បីទទួលបានចំនួនពិតប្រាកដ នៃអ្នកស្លាប់ដោយជំងឺរាតត្បាត ។

មន្ត្រីបាននិយាយថា “ដំណើរការនៃការចងក្រងទិន្នន័យ ត្រូវបានផ្តួចផ្តើមពីថ្ងៃទី ១ ឧសភា ។ រហូតមកដល់ពេលនេះ យើងបានរកឃើញភាពខុសគ្នាយ៉ាងខ្លាំង ពោលមានចំនួនរាប់ពាន់នាក់ រវាងទិន្នន័យដែលយើងបានប្រមូលពីឈាបនដ្ឋាន និងចំនួនដែលរដ្ឋាភិបាលរដ្ឋផ្តល់ឲ្យ” ។

មន្ត្រីប៉ូលិសបន្តថា “មន្ត្រីស្រុកទាំងអស់ ត្រូវបានគេប្រាប់ឲ្យទៅមើលកន្លែងបូជាសព នៅតំបន់របស់ពួកគេ ដើម្បីប្រមូលទិន្នន័យពីអ្នកទទួលបន្ទុកកន្លែងបូជាសព ឬបញ្ចុះសព ដែលគ្របដណ្តប់លើតំបន់ជនបទ ក៏ដូចជាទិន្នន័យទាំងអស់ត្រូវបានចែករំលែកជាមួយមន្ត្រីជាន់ខ្ពស់ ក្នុងអំឡុងពេលធ្វើកំណត់ហេតុប្រចាំថ្ងៃពេលព្រឹក ហើយក្រោយមក វាត្រូវប្រគល់ទៅការិយាល័យកំណត់ត្រាឧក្រិដ្ឋកម្ម (CRO) ។

នៅឆ្នាំនេះ ចន្លោះពីថ្ងៃទី ១ ខែមេសា ដល់ថ្ងៃទី ១៧ ខែឧសភា រដ្ឋាភិបាលទីក្រុងដេលីបានអះអាងថា មនុស្សចំនួន ១០,៤៦២ នាក់បានស្លាប់ដោយសារជំងឺកូវីដ ១៩ ។ ទោះយ៉ាងណាទិន្នន័យរបស់ CRO ដែលមើលឃើញដោយ Sputnik បានបង្ហាញថា សាកសពជនរងគ្រោះជំងឺកូវីដ ១៩ ចំនួន ២០,២២៥ នាក់ត្រូវបានគេបូជានៅឯកន្លែងបញ្ចុះសព និងកន្លែងបូជាសពផ្សេងៗ ។

គួរបញ្ជាក់ថា គិតត្រឹមពេលនេះ ប្រទេសឥណ្ឌា មានករណីឆ្លងជំងឺកូវីដ ១៩ ជាង ២៦ លានករណី និងមានអ្នកស្លាប់ចំនួន ២៩៥,៥២៥ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ទាំងអ្នកជំងឺនិងអ្នកមិនឈឺ សម្រុកកកកុញទៅយកឱសថបុរាណ ឥណ្ឌា ពីគ្រូថ្នាំម្នាក់ ដោយជឿថា អាចព្យាបាលកូវីដបាន 

ចុចអាន ៖ ឥណ្ឌា ផ្ទុះ “ជំងឺផ្សិតស” មួយទៀត សាហាវជាង “ជំងឺផ្សិតខ្មៅ”