ប្រទេសឡាវ បន្តបិទខ្ទប់ក្រុង​វៀងច័ន្ទ ១៤ ថ្ងៃទៀត តែបន្ធូរវិធានការមួយចំនួន

ប្រទេសឡាវ បានប្រកាសបន្តបិទខ្ទប់ទីក្រុងវៀងច័ន្ទរយៈពេល ១៤ ថ្ងៃបន្ថែមទៀត ចាប់ពីថ្ងៃទី ២០ ខែមិថុនា រហូតដល់ថ្ងៃទី ៤ ខែកក្កដា ដោយសារតែស្ថានភាពនៅតែបន្តមានការឆ្លងជំងឺកូវីដ១៩។

ស្ថានទូតកម្ពុជាប្រចាំប្រទេសឡាវ បានបញ្ជាក់ថា វិធានការបិទខ្ទប់ និងការបន្ធូរបន្ថយវិធានការមួយចំនួននៅក្នុងក្រុងវៀងច័ន្ទរួមមាន ៖

• បន្តបិទកន្លែងស៊ីផឹក កាស៊ីណូ ខារ៉ាអូខេ កន្លែងកម្សាន្ត កន្លែងម៉ាស្សា ក្លឹបកីឡាគ្រប់ប្រភេទ ហាមលក់គ្រឿងស្រវឹង ហាមជួបជុំគ្នាលើសពី ៥០ នាក់ ហាមមិនឱ្យពលរដ្ឋដែលមិនទាន់ទទួលចាក់វ៉ាក់សាំងកូវីដ១៩ ធ្វើដំណើរតាមរថយន្ត និងជិះរថយន្ត និងហាមចេញចូលតំបន់ក្រហម។
• អនុញ្ញាតឱ្យបើកដំណើរការពាណិជ្ជកម្ម ផ្សារទំនើប ផ្សារលក់ដុំ និងលក់រាយ កន្លែងដើរហាត់ប្រាណ ទូកនេសាទ ភោជនីយដ្ឋានម្ហូបអាហារ ហាងកាហ្វេ រមណីយដ្ឋានទេសចរណ៍ និងហាងកាត់សក់ កែសម្ផស្ស។
• អនុញ្ញាតឱ្យមានកិច្ចប្រជុំ បើកសាលារៀន នៅតំបន់ពុំមានការឆ្លងជំងឺកូវីដ១៩ ក្នុងសហគមន៍ អាចធ្វើដំណើរចេញ-ចូល ក្នុងតំបន់ដែលមិនមែនជាតំបន់ក្រហម។
• អាចធ្វើដំណើរឆ្លងខេត្តបានតាមរថយន្ត ចំពោះអ្នកដែលបានទទួលវ៉ាក់សាំងកូវីដ១៩ ចំនួនពីរដូសរួចហើយ។ រថយន្តដឹកទំនិញមិនបាច់ធ្វើចត្តាឡីស័ក នឹងអាចចេញចូលក្រុងបាន។

ទោះយ៉ាងណា អាជ្ញាធរសុខាភិបាលឡាវកាលពីពេលថ្មីៗ បាននិយាយថា មនុស្សគ្រប់រូបដែលចូលក្នុងប្រទេសឡាវ ត្រូវតែអនុវត្តតាមវិធានការការពារ និងត្រួតពិនិត្យតាមស្ដង់ដានៃជំងឺកូវីដ ១៩ ទោះបីពួកគេទទួលការចាក់វ៉ាក់សាំងពេញ ២ ដូសក៏ដោយ។

បច្ចុប្បន្ន អាជ្ញាធរឡាវក៏កំពុងពន្លឿនយុទ្ធនាការចាក់វ៉ាក់សាំងផងដែរ ដោយសង្ឃឹមថាអាចចាក់វ៉ាក់សាំងដល់ប្រជាជនឲ្យបាន ៥០ ភាគរយនៅចុងឆ្នាំ ២០២១ នេះ។

គិតត្រឹមថ្ងៃសុក្រសប្តាហ៍មុន ប្រទេសឡាវមានករណីឆ្លងជំងឺកូវីដ ១៩ ចំនួន ២,០៤៧ ករណី និងមានអ្នកស្លាប់ ៣ នាក់ ខណៈមានអ្នកជាសះស្បើយ ១,៩៣១ នាក់ផងដែរ៕ អត្ថបទ ៖ ឡេង ដេត