កីឡា

ដឹងអ្វីខ្លះពីម្ចាស់ខ្សែក្រវាត់មួយថៃ ONE Strawweight ថ្មី Prajanchai?

បានផុស

៤ years មុន

នៅ

ថ្ងៃអង្គារ ៣ សីហា ២០២១

ដោយ

Prajanchai PK.Saenchai Muaythaigym ទើបតែគ្រងខ្សែក្រវាត់មួយថៃ ONE Strawweight នៅព្រឹត្តិការណ៍ ONE: BATTLEGROUND កាលចុងខែ កក្កដា កន្លងទៅនៅកីឡដ្ឋាន Singapore Indoor Stadium នៃប្រទេសសិង្ហបុរី។ Prajanchai បានយកឈ្នះពិន្ទុជាឯកច្ឆន្ទលើវីរបុរសមួយថៃ Sam-A Gaiyanghadao ក្នុងការប្រកួត ៥ ទឹកយ៉ាងល្អមើល និង ជាការផ្ដួលតារាជើងចាស់វ័យ ៣៧ ឆ្នាំឲ្យបរាជ័យលើកដំបូងក្នុងទម្ងន់ Strawweight។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Prajanchai ហាត់នៅក្លិបល្បីជាមួយវីរបុរស Saenchai
នៅស្រុកថៃនរណាមិនស្គាល់វីរបុរសមួយថៃ Saenchai ហើយពេលនេះ ម្ចាស់ខ្សែក្រវាត់ថ្មីទម្ងន់ Strawweight គឺ Prajanchai ក៏ជាកូនសិស្សរបស់កីឡាករជើងចាស់រូបនេះដែរ។ ដ្បិតវ័យ ៤១ ឆ្នាំ Saenchai បង្ហាត់ផង និងប្រកួតផងរង្គើសង្វៀននៅស្រុកថៃទៅហើយ។ បើនិយាយអំពីការប្រកួតមួយថៃវិញ Saenchai ឈ្នះ ៣០៣ ដង, ចាញ់ ៤១ ដង និងស្មើ ៥ ដង។ តាំងពីឆ្នាំ ២០១៤ មកដល់ ឆ្នាំ ២០២១ នេះ វីបុរសវ័យ ៤១ ឆ្នាំមិនដែលចាញ់ការប្រកួតឡើយនៅកម្មវិធីនានា។ ចំណែក Prajanchai បានរៀនពីគ្រូ Saenchai ទាំងជំនាញកណ្ដាប់ដៃរហ័សដូចផ្លេកបន្ទោរ និង ការទាត់ជើងដ៏មានប្រសិទ្ធភាពផងដែរ ដែលនាំឲ្យរូបគេផ្ដួល Sam-A បាន។

Prajanchai ឈ្នះជើងឯកមួយថៃលំដាប់ពិភពលោក និងប្រដាល់សកល

មុនក្លាយជាម្ចាស់ខ្សែក្រវាត់ ONE Strawweight នៅសង្វៀនធំបំផុតប្រចាំតំបន់អាស៊ី និងលំដាប់ពិភពលោក Prajanchai ឈ្នះជើងឯកមួយថៃ OneSongchai ឆ្នាំ ២០១២, ឈ្នះខ្សែក្រវាត់សង្វៀនល្បីនៅថៃ៣ខ្សែគឺ សង្វៀន Rajadamnern Stadium ម្ដងឆ្នាំ ២០១២ និង សង្វៀន Lumpinee Stadium ពីរដងនៅឆ្នាំ ២០១៤ និង ឆ្នាំ ២០២០ ថ្មីៗនេះឯង។

មិនត្រឹមតែប្រកួតមួយថៃដ៏ចំណាន ហើយរឿងដ៏អស្វារ្យមួយទៀត កីឡាករវ័យ ២៦ ឆ្នាំរូបនេះឈ្នះជើងឯកប្រដាល់សកល WBA Asia South កាលឆ្នាំ ២០២០ កន្លងទៅផងដែរ។

ការប្រកួតបន្ទាប់ Prajanchai នឹងត្រៀមខ្លួនរក្សា និងការពារខ្សែក្រវាត់ ONE Strawweight ឲ្យបានយូរនៅសង្វៀន ONE Championship តាមតែអាចធ្វើទៅបាន ដូចអ្វីដែល Sam-A ធ្លាប់ធ្វើកន្លងមកអីចឹង៕