កីឡា

ចាន់ រតនា ចាត់ទុកថាជា ការល្អវិញ ដែលពេលនេះ Roni ប្រកួតមួយដៃគូថ្មី

បានផុស

៤ years មុន

នៅ

ថ្ងៃពុធ ៤ សីហា ២០២១

ដោយ

កាលពីខែមុន ទាំងអ្នកគាំទ្រនៅប្រទេសកម្ពុជា និង ឥណ្ឌូណេស៊ីបានចាប់អារម្មណ៍នឹងអ្នកលេងគុនចម្រុះឥណ្ឌូណេស៊ី Eko Roni Saputra ប្រកាសចង់ជួបអ្នកលេងគុនចម្រុះកម្ពុជា ចាន់ រតនា នៅលើឆាកសង្វៀនពិភពលោក ONE Championship។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះគឺ Eko Roni ចង់សងសឹកឲ្យមិត្តរួមជាតិ២រូបគឺ Abro Fernandes និង Rudy Agustian បានចាញ់ក្រោមកណ្តាប់ដៃរបស់អ្នកលេងគុនចម្រុះលេខ១កម្ពុជា ចាន់ រតនា ក្នុងទឹកទី២ដូចគ្នា។

បន្ទាប់មក ចាន់ រតនា បានឆ្លើយតបទទួលយកដោយមានកម្លាំងចិត្ត និងជឿជាក់ថែមទៀតផង ប្រសិនបើ ONE ពិតជារៀបចំឲ្យជួបគ្នាលើសង្វៀនដូចការចង់បានរបស់កីឡាករឥណ្ឌូណេស៊ីមែន។

ទោះបីជាយ៉ាងណា ដោយសារស្ថានភាពកូវីដ-១៩មិនអំណោយផលទាន់ពេលវេលាបាន ពេលនេះ Eko Roni Saputra ត្រូវបានផ្គូផ្គងឲ្យប្រកួតជាផ្លូវការឲ្យប្រកួតជាមួយកីឡាករចិន Liu Peng Shuai នាថ្ងៃសុក្រ ទី១៣ ខែសីហាខាងមុខនេះហើយនៅក្នុងព្រឹត្តិការណ៍ ONE: BATTLEGROUND II នៅប្រទេសសិង្ហបុរី។

បន្ទាប់ពីដឹងដំណឹងថា Roni ជួបដៃគូថ្មី អ្នកលេងគុនចម្រុះកម្ពុជា ចាន់ រតនា អាយុ៣៥ឆ្នាំបានចាត់ទុកថាប្រការល្អម្យ៉ាងដែរ។

ចាន់ រតនា បាននិយាយថា ៖«ខ្ញុំគិតថា ល្អដែរ នៅពេល Roni បានប្រកួតជាមួយដៃគូថ្មី។ ពីព្រោះវាបានផ្តល់ពេលវេលាឲ្យខ្ញុំបានយូរក្នុងការត្រៀមខ្លួន។ ចាប់តាំងពីបានដឹងពីការចង់ជួបរបស់គាត់មក ខ្ញុំបានហ្វឹកហាត់ជាប្រចាំដើម្បីត្រៀមខ្លួនប្រកួត»។

«រហូតដល់ពេលនេះ ខ្ញុំនៅតែហ្វឹកហាត់ ហើយហ្វឹកហាត់បន្តទៀត ពីព្រោះខ្ញុំគិតថា នៅពេលខាងមុខនេះអាចបានប្រកួតជាមួយ Roni មិនខាន។ ជាពិសេសទៀតនោះ ជាឱកាសដែលខ្ញុំអាចស្វែងយល់ពីក្បាច់វ៉ៃរបស់គាត់បានច្រើន។ នៅពេលគាត់ឡើងប្រកួត ខ្ញុំនឹងតាមដានមើលពីចំណុចខ្លាំង និងខ្សោយ»៕