ព័ត៌មានជាតិ

អាជ្ញាធរកំពុងចុះវាយតម្លៃការខូចខាតនិងផលប៉ះពាល់ទ្រព្យសម្បត្តិពលរដ្ឋដោយសារជំនន់ទឹកភ្លៀង

បានផុស

៥ years មុន

នៅ

ថ្ងៃពុធ ២៥ សីហា ២០២១

ដោយ

លោក ឃាង ភារម្យ អ្នកនាំពាក្យសាលាខេត្តព្រះសីហនុ បានមានប្រសាសន៍នៅព្រឹកថ្ងៃទី២៥ ខែសីហានេះថា អាជ្ញាធរក្រុងកំពុងចុះវាយតម្លៃការខូចខាតនិងផលប៉ះពាល់ទ្រព្យសម្បត្តិរបស់ប្រជាពលរដ្ឋដោយសារជំនន់ទឹកភ្លៀងកាលពីយប់មិញ ហើយនឹងដឹងលទ្ធផលនាពេលឆាប់ៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា ការចុះវាយតម្លៃផលប៉ះពាល់នេះបន្ទាប់ពីកាលពីនៅយប់ថ្ងៃទី២៤ ខែសីហា ឆ្នាំ២០២១នេះ នៅក្នុងក្រុងព្រះសីហនុ ចាប់ពីចន្លោះម៉ោង០៥:០០នាទីល្ងាចដល់ម៉ោង០៨:០០នាទីយប់មានភ្លៀងធ្លាក់ខ្លាំងដោយកម្រិតទឹកភ្លៀងកើនឡើងពីចន្លោះ១២០មម ទៅដល់២៧៩មម សរុបបរិមាណទឹកភ្លៀង ២៨៥៨,១មម បណ្តាលឱ្យទឹកជន់លិចនៅតំបន់ទំនាបមួយចំនួន។

លោកបានបន្តថា ប៉ុន្តែមកដល់ម៉ោង១០:០០នាទីយប់ ទឹកភ្លៀងបានស្រកវិញនៅតាមអូរប្រឡាយសំខាន់ៗនៅក្នុងក្រុងព្រះសីហនុ។

លោក ឃាង ភារម្យ បានបន្តថា បើយោងតាមការព្យាករណ៍ នឹងមានករណីភ្លៀងធ្លាក់ជាបន្តបន្ទាប់នៅខេត្តព្រះសីហនុ ដូច្នេះរដ្ឋបាលខេត្តសូមអំពាវនាវដល់បងប្អូនប្រជាពលរដ្ឋទាំងអស់ត្រូវបង្កើនការប្រុងប្រយ័ត្នឱ្យបានខ្ពស់បំផុត ដោយស្វែងរកទីតាំងដែលមានសុវត្ថិភាព និងកុំចាកចេញពីផ្ទះបើគ្មានភាពចាំបាច់ ជាពិសេសកុំធ្វើដំណើរតាមដងផ្លូវជម្រាលភ្នំ និងទីកន្លែងដែលមានទឹកហូរកាត់ខ្លាំងដើម្បីបញ្ចៀសគ្រោះថ្នាក់ដែលអាចកើតឡើងជាយថាហេតុ។

យោងតាមសេចក្តីជូនដំណឹងរបស់ក្រសួងធនធានទឹកនិងឧតុនិយមនៅថ្ងៃទី២៤ ខែសីហានេះបានឲ្យដឹងថា ស្ថានភាពធាតុអាកាស ក្នុងសប្ដាហ៍ខាងមុខនេះ ព្រះរាជាណាចក្រកម្ពុជា នឹងទទួលឥទ្ធិ ពលពីជ្រលងសម្ពាធទាបឥណ្ឌា ក្នុងកម្រិតខ្លាំង ហើយទន្ទឹមនោះក៏នឹងអាចកើតមាននៅជ្រលងសម្រាបទាប ITCZសារជាថ្មីផងដែរ ។

បើតាមក្រសួងធនធានទឹកស្ថានភាពបែបនេះនឹងធ្វើឲ្យមានភ្លៀងធ្លាក់ខ្លាំងលាយឡំផ្គររន្ទះនិងខ្យល់កន្ត្រាក់ដែលទាមទារឲ្យបងប្អូនប្រជាពលរដ្ឋមានការប្រុងប្រយ័ត្នខ្ពស់ពីគ្រោះថ្នាក់នៃបាតភូតធម្មជាតិទាំងនេះចាប់ពីថ្ងៃទី២៥ រហូតដល់ថ្ងៃទី៣១ ខែសីហា ឆ្នាំ២០២១។

បើតាមព្យាករណ៍នៅតាមបណ្តាខេត្តជាប់មាត់សមុទ្រអាចនឹងមានភ្លៀងធ្លាក់ក្នុងកម្រិតពីមធ្យមទៅច្រើនហើយ នៅលើផ្ទៃសមុទ្រអាចមានភ្លៀងធ្លាក់ច្រើន និងរលកសមុទ្រមានកម្ពស់មធ្យម ៕

អត្ថបទ ៖ សំអឿន