សម្តេចតេជោ ហ៊ុន សែន៖ ការចាក់វ៉ាក់សាំងដូសទី៤ អាស្រ័យទៅលើការវិវត្ត របស់ពិភពលោក និងមេរោគកូវីដ-១៩

មានប្រសាសន៍នៅក្នុងពិធីបើកយុទ្ធនាការថ្នាក់ជាតិ ចាក់វ៉ាក់សាំងការពារជំងឺកូវីដ-១៩ ជូនដល់កុមារ អាយុចាប់ពី ០៦ឆ្នាំ ដល់អាយុក្រោម១២ឆ្នាំ នៅវិមានសន្តិភាពនាព្រឹកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអះអាងថា ការចាក់វ៉ាក់សាំងដូសទី៤ វាអាស្រ័យទៅលើការវិវត្តរបស់ពិភពលោក និងការវិវត្ត នៃមេរោគកូវីដ-១៩ តែបើស្ថានភាពតម្រូវ គឺត្រូវតែធ្វើខានមិនបាន។

សម្តេចប្រមុខរាជរដ្ឋាភិបាលបានបានលើកឡើងថា ការចាក់វ៉ាក់សាំងដូសទី៤ វាអាស្រ័យទៅលើការវិវត្ត នៃជំងឺកូវីដ១៩ និងប្រសិទ្ធភាព នៃវ៉ាក់សាំង ដែលយើងត្រូវធ្វើការតាមដានលើបញ្ហានេះ សម្រាប់ការវិវត្តជាក់ស្ដែងរបស់ពិភពលោក ជាមួយនឹងវាក់សាំង ហើយគូបផ្សំជាមួយការណែនាំរបស់អង្គការសុខភាពពិភពលោកផងដែរ។

សម្ដេចតេជោបានអះអាងថា មានប្រទេសមួយចំនួនបានចាក់ដូសទី៤ រួចហើយដែរ តែសម្ដេចមិនបញ្ជាក់ ថា ជាប្រទេសណានោះទេ ដែលប្រទេសនោះ គេចាក់ដូសទី៣ ហើយឈានទៅចាក់ដូសទី៤ ថែមទៀត។

សម្ដេចបានបន្តថា ប្រសិនបើចាក់ដូសទី៤ទៀត យើងនឹងត្រូវចាយលុយទៀតហើយ តែយ៉ាងណាយើងត្រូវតែធ្វើដោយខានមិនបានដូច្នេះបញ្ហានេះស្ថិតនៅលើការសិក្សា ស្ថិតនៅលើការវិវត្តនាពេលខាងមុខ៕

អត្ថបទៈ កោះកែវ