ខេត្តកំពង់ឆ្នាំ​ង ប្រកាស​​ហាម​ជួប​ជុំលើសពី ១០ នាក់ បិទ​រមណីយដ្ឋាន​ធម្មជាតិ​ទូទាំង​ខេត្ត

អាជ្ញាធរ​ខេត្តកំពង់ឆ្នាំង​បាន​ចេញ​វិធានការ​រដ្ឋបាលរយៈពេល ១០ ថ្ងៃ ចាប់ពីថ្ងៃ ២៧ កញ្ញា ដល់​ថ្ងៃ ០៦ តុលា ២០២១ ដើម្បីទប់ស្កាត់​ការ​ឆ្លងរាលដាលជំងឺ​កូវីដ ១៩។

ការ​ដាក់ចេញវិធានការ​ ដោយ​មានការ​ហាមឃាត់ និង​ផ្អាកជាបណ្តោះអាសន្ននូវរាល់សកម្មភាពដែលប្រឈម​នាំ​ឲ្យមានក​ឆ្លងរាលដានៃកូវីដ ១៩ ចូល​ក្នុង​សហគមន៍មាន​​ដូចតទៅ៖

– ការរៀបចំពិធីកាន់បិណ្ឌ និងភ្ជុំបិណ្ឌ ចាប់ពីបិណ្ឌទី៤ រហូតដល់ថ្ងៃភ្ជុំបិណ្ឌ នៅតាមបណ្តាវត្តអារាមនានា។
– សកម្មភាពមុខរបរ និងអាជីវកម្មក្លឹបកម្សាន្តគ្រប់ប្រភេទ ជាអាទីខារ៉ាអូខេ ឌីស្គូរតែក និងបៀហ្គាឌីន រមណីយដ្ឋាន ធម្មជាតិ សួនកម្សាន្តនានា អាជីវកម្មម៉ាស្សា ហាងលក់ និងសេពគ្រឿងស្រវឹងគ្រប់ប្រភេទ សារមន្ទីរ បណ្ណាល័យ ការប្រគុំតន្ត្រី ក្លឹបហាត់ប្រាណ និងមជ្ឈមណ្ឌលកីឡា។
– សកម្មភាពការងារ មុខរបរ និងអាជីវកម្មផ្សេងទៀត ដោយយោងតាមតម្រូវការចាំបាច់ក្នុងការប្រយុទ្ធ និងទប់ស្កាត់ការឆ្លងរាលដាលនៃជំងឺកូវដ-១៩។
– រាល់សកម្មភាពនៃការជួបជុំឬការប្រមូលផ្តុំមនុស្សជាលក្ខណៈឯកជនដែលមានមនុស្សចូលរួមលើសពី ១០(ដប់)នាក់ ត្រូវមានការអនុញ្ញាតពីអាជ្ញាធរមានសមត្ថកិច្ច។
– រាល់ការជួបជុំ ឬប្រមូលផ្តុំមនុស្សដើម្បីសេពគ្រឿងស្រវឹង និងល្បែងស៊ីសងគ្រប់ប្រភេទ។
– រាល់ការជួបជុំក្រាលកន្ទេលអង្គុយហូបអាហារតាមសួនច្បារម្លប់ឈើ និងតាមទឹកម្សាន្តនានា ដែលមិនបានរក្សាគម្លាតសុវត្ថិភាព។
– សកម្មភាពអាជីវកម្មពេលរាត្រី រួមមានតូបលក់ចល័ត ម៉ា ហាងលក់ទំនិញគ្រប់ប្រភេទ ការជួបជុំនៅតាម ទីសាធារណៈនានាដែលមានសភាពអ៊ូអរ និងការជួបជុំមនុស្សច្រើន ត្រូវហាមឃាត់ចាប់ពីម៉ោង ២១:០០ (ម្ភៃមួយ និងសូន្យ)នាទី ដល់ម៉ោង ០៣:០០(បី និងសូន្យ)នាទី ជាកំហិត។
– សកម្មភាពប្រមូលផ្តុំមនុស្ស ក្នុងការថ្វាយបង្គំតាមបែបសាសនា។