ប៉ះទង្គិចគ្នា ៣ ម៉ោងរវាង តាលីបង់ និងក្រុមប្រដាប់អាវុធ អាហ្វហ្គានីស្ថាន ស្លាប់ ១៧ នាក់

ទីភ្នាក់ងារសារព័ត៌មាន Sputnik បានរាយការណ៍នៅថ្ងៃចន្ទនេះថា មនុស្សចំនួន ១៧ នាក់ត្រូវបានសម្លាប់នៅក្នុងការប៉ះទង្គិចគ្នារយៈពេល ៣ ម៉ោងរវាងក្រុមអ្នកប្រយុទ្ធតាលីបង់ និងក្រុមប្រដាប់អាវុធនៅក្នុងខេត្ត Herat ភាគខាងលិចប្រទេសអាហ្វហ្គានីស្ថាន ។

ប្រភពបាននិយាយថា “សាកសពមនុស្ស ១៧ នាក់ក្នុងនោះមានកុមារ ៧ នាក់ ស្ត្រី ៣ នាក់ និងបុរស ៧ នាក់ត្រូវបានបញ្ជូនទៅមន្ទីរពេទ្យក្នុងខេត្ត Herat ហើយអ្នក​ទាំង​អស់​បាន​ស្លាប់ ​ដោយសារ​របួសធ្ងន់ធ្ងរពី​គ្រាប់​កាំភ្លើង” ។

យោងតាមមន្ត្រីអាហ្វហ្គានីស្ថានបានឲ្យដឹងថា ក្រុមតាលីបង់បានបើកប្រតិបត្តិការពិសេសមួយនៅខេត្ត Herat កាលពីថ្ងៃអាទិត្យ ប្រឆាំងនឹងឧក្រិដ្ឋជនក្នុងស្រុកដែលពាក់ព័ន្ធនឹងការចាប់ជំរិត ដែលក្នុងនោះយ៉ាងហោចណាស់ឧក្រិដ្ឋជន ៣ នាក់ត្រូវបានសម្លាប់ ក្នុងអំឡុងពេលប្រតិបត្តិការ ។

ទន្ទឹមនោះ អ្នកនាំពាក្យក្រសួងមហាផ្ទៃលោក Qari Saeed Khosti បានចោទប្រកាន់ថា អ្នកចាប់ជំរិត ៣ នាក់ដែលលាក់ខ្លួននៅក្នុងផ្ទះមួយត្រូវបានសម្លាប់ ក្នុងអំឡុងពេលប្រតិបត្តិការរបស់ប៉ូលិស ។ ទោះ​យ៉ាង​ណា អ្នក​នាំ​ពាក្យ​​ខេត្តរបស់ក្រុមតាលីបង់ ​បាន​ផ្តល់​ព័ត៌មាន​ខុស​គ្នា​អំពី​រឿង​នេះ ។

ដំបូងឡើយ ប្រព័ន្ធផ្សព្វផ្សាយក្នុងស្រុកមួយចំនួនបានរាយការណ៍ថា កងកម្លាំងតាលីបង់បានវាយឆ្មក់អតីតក្រុមបំបែកខ្លួនដែលទើបតែបានចូលរួមជាមួយក្រុមរដ្ឋឥស្លាម (IS) ។ ក្រុម​ជ្រុលនិយម​ទាំងពីរ​បាន​ប្រយុទ្ធ​គ្នា​តាំងពី​ការ​លេច​ចេញ​នៃ​ក្រុម IS នៅ​អាហ្វហ្គានីស្ថាន​ក្នុង​ឆ្នាំ ២០១៥ ។

គួរបញ្ជាក់ថា ក្រុមតាលីបង់បានឡើងកាន់អំណាចក្នុងប្រទេសអាហ្វហ្គានីស្ថាន បន្ទាប់ពីដណ្តើមបានរដ្ឋធានីកាប៊ុលកាលពីថ្ងៃទី ១៥ ខែសីហា ។ ដោយសារតែរដ្ឋាភិបាលមុនបានដួលរលំ ហើយពលករបរទេសមួយចំនួនធំ និងសម្ព័ន្ធមិត្តអាហ្វហ្គានីស្ថាន បានចាប់ផ្តើមចាកចេញពីប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ News NCR

ចុចអាន ៖ រុស្ស៊ី ពិចារណាថាដកក្រុម តាលីបង់ ចេញពីបញ្ជីអង្គការភេរវកម្ម