សម្តេច ហ៊ុន សែន៖ អ្នកធុរកិច្ច អ្នកការទូតបរទេសអាចជួបនាយករដ្ឋមន្ត្រីបានភ្លាមៗក្រោយតេស្តអវិជ្ជមាន​កូ​វីដ​

សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​បញ្ជាក់ថា អ្នក​ធុរកិច្ច និង​អ្នកការទូត​បរទេស ដែល​ចូល​កម្ពុជា ក្រោយ​ធ្វើតេស្ត​ឃើញ​អវិជ្ជមាន​កូ​វីដ​-១៩ អនុញ្ញាតឱ្យ​ជួប​នាយករដ្ឋមន្ត្រី​បាន ដោយ​មិនចាំបាច់​ធ្វើ​ច​ត្តា​ឡី​ស័ក ឬ​បើ​ធ្វើ​ច​ត្តា​ឡី​ស័កយ៉ាងយូរ​ត្រឹម​៣​ថ្ងៃ​ប៉ុណ្ណោះ​។​

សម្តេច​ថ្លែង​បែបនេះ នៅក្នុង​ពិធី​ប្រកាស​បិទ​យុទ្ធនា​ការចាក់​វ៉ាក់សាំង​បង្ការ​ជំងឺ​កូ​វីដ​-១៩ ជុំ​ទី​១ សម្រាប់​ក្រុម​អាយុ​ចាប់ពី៦​ឆ្នាំ​ឡើង ក្នុង​ក្របខណ្ឌ​ទូទាំងប្រទេស និង​ប្រកាស​បើក​យុទ្ធនា​ការចាក់​វ៉ាក់សាំង​បង្ការ​ជំងឺ​កូ​វីដ​-១៩ ជូន​កុមារ​អាយុ៥​ឆ្នាំ ដែល​ចាប់ផ្ដើម​ពីថ្ងៃ​ចន្ទ ទី​០១ ខែវិច្ឆិកា ឆ្នាំ​២០២១ ។​

សម្តេច​បាន​សង្កត់ធ្ងន់​ថា ការធ្វើ​បែបនេះ គឺ​ដើម្បី​ទាក់ទាញ​ក្រុម​ធុរកិច្ច​ឱ្យ​ចូលមក​វិនិយោគ​នៅ​កម្ពុជា​។​

ជាមួយគ្នានេះ សម្តេច​គូសបញ្ជាក់​ទៀតថា សម្រាប់​ធុរកិច្ច​ខ្មែរ ដែល​ចេញចូល​បរទេស អាចធ្វើ​ច​ត្តា​ឡី​ស័ក នៅផ្ទះ​ខ្លួនឯងបាន ដោយ​មិនចាំបាច់​ធ្វើ​នៅ​សណ្ឋាគារ​។ សម្តេចនាយក​រដ្ឋមន្ត្រី ថ្លែង​ដូច្នេះ​ថា​«​អ្នកណា​ដែលមាន​លទ្ធភាព​ធ្វើ​ច​ត្តា​ឡី​ស័ក​នៅផ្ទះ​ឱ្យ​ធ្វើទៅ ដោយ​មិនចាំបាច់​សុំច្បាប់​ដល់​ខ្ញុំ​ទេ​»៕​

អត្ថបទ៖ ទួន សុផល