ព័ត៌មានអន្ដរជាតិ

អឺរ៉ុបផ្ទុះកូវីដជាថ្មីគឺជាការព្រមានដល់តំបន់ផ្សេងទៀត

បានផុស

៤ years មុន

នៅ

ថ្ងៃសុក្រ ៥ វិច្ឆិកា ២០២១

ដោយ

អឺរ៉ុបមានករណីឆ្លងកូវីដ-១៩ជាថ្មីកើនឡើងដល់៥៥%ក្នុងរយៈពេល៤សប្តាហ៍ចុងក្រោយនេះ បើទោះជាបានចាក់វ៉ាក់សាំងច្រើនក៏ដោយដែលវាជាសញ្ញាព្រមានដល់តំបន់ផ្សេងៗទៀត។ នេះជាការលើកឡើងរបស់មន្ត្រីអង្គការសុខភាពពិភពលោក (WHO) កាលពីថ្ងៃព្រហស្បតិ៍ម្សិលមិញ។

នាយកផ្នែកអាសន្នរបស់ WHO លោក Mike Ryan បាននិយាយថា ប្រទេសនៅអឺរ៉ុបមួយចំនួនបានដំណើរការចាក់វ៉ាក់សាំងបានល្អ។ លោកថា ៖«នេះជាការព្រមានមួយសម្រាប់ពិភពលោកដែលឃើញនូវអ្វីកំពុងកើនឡើងនៅអឺរ៉ុប បើទោះជាបានគ្របដណ្តប់ដោយវ៉ាក់សាំងក៏ដោយ»។

ករណីឆ្លងកូវីដ-១៩បានកំពុងឈានឡើងដល់ជាប់កំណត់ត្រាជាថ្មីនៅតាមបណ្តាប្រទេសជាច្រើនស្ទើរទូទាំងអឺរ៉ុប ខណៈរដូវរងាចូលមកដល់ដែលជំរុញឲ្យមានការអំពាវនាវដើម្បីដោះស្រាយបន្ទាន់ ហើយអង្គការសុខភាពពិភពលោកបានចាត់ទុករលកផ្ទុះជាថ្មីជា«ក្តីបារម្ភដ៏ធ្ងន់ធ្ងរ»។

ប្រធានវិទ្យាសាស្ត្ររបស់ WHO លោក Soumya Swaminathan បាននិយាយថា វ៉ាក់សាំងបង្ការកូវីដ-១៩ Covaxin របស់ក្រុមហ៊ុនឥណ្ឌា Bharat Biotech មានប្រសិទ្ធភាពប្រឆាំងនឹងវីរុសបំប្លែងខ្លួន Delta ប្រហែលជា៧០%។ អង្គការសុខភាពពិភពលោកបាននិយាយកាលពីថ្ងៃពុធថា ខ្លួនបានអនុម័តជាផ្លូវការចំពោះវ៉ាក់សាំងនេះសម្រាប់ការប្រើប្រាស់បន្ទាន់ហើយ។

ប្រធានប្រចាំតំបន់របស់ WHO លោក Hans Kluge បាននិយាយថា ៖«ល្បឿនឆ្លងបច្ចុប្បន្ននេះទូទាំង៥៣ប្រទេសនៅតំបន់អឺរ៉ុបគឺជាកង្វល់ដ៏ធ្ងន់ធ្ងរ»។ លោកបន្ថែមថា ការរាលដាលឆ្លងខ្លាំងដោយសារវីរុសបំប្លែងខ្លួនឆ្លងលឿន Delta។

កូវីដនឹងរាលដាលកាន់តែខ្លាំងនៅរដូវរងានេះ។ លោក Kluge បានព្រមានថា ប្រសិនបើអឺរ៉ុបដើរតាមគន្លងបច្ចុប្បន្ននេះ អាចនឹងមានមនុស្សស្លាប់ដោយកូវីដដល់៥០ម៉ឺននាក់ទៀតត្រឹមខែកុម្ភៈខាងមុខ៕

ប្រែសម្រួល៖ វីរបុត្រ
ប្រភព៖ reuters