បឹងអភិរក្ស​ឆ្នុកអណ្តែង ​ត្រូវ​បាន​គេឈូស​ឆាយ​ធ្វើ​ស្រែ​ឯកជន​ រាប់សិបហិកតា អាជ្ញាធរ​មិន ទាន់​​មាន​ចំណាត់ការ​

តាមមាត់បឹងអភិរក្សឆ្នុកអណ្ដែង ស្ថិតនៅ ក្នុងអតីតឡូលេខ ១៤ ក្នុងភូមិពាមពពេច ឃុំកោះថ្កូវ ស្រុកជលគិរី ជាង២០ឆ្នាំមុន មានព្រៃលិចទឹកដុះក្រាស់ឃ្មឹកនៅ ជុំវិញបឹងជ្រៀតចូលមិនរួចនោះទេ តែឥឡូវត្រូវបានគេលួចឈូសឆាយព្រៃលិចទឹកជុំវិញមាត់បឹង និងបោះរបងព័ទ្ធយកកាន់កាប់ជាកម្មសិទ្ធិឯកជន ធ្វើស្រែយូរឆ្នាំហើយ។ នេះបើតាមការរាយការណ៍ របស់ប្រជាពលរដ្ឋ ប្រាប់ក្រុមអ្នកសារព័ត៌មាន។

លោក សូ ហេង អាយុ ៦១ ឆ្នាំ រស់នៅភូមិភ្លង ឃុំពាមឆ្កោក ស្រុកជលគិរី ជាអ្នកធ្វើស្រែជុំវិញមាត់បឹងអភិរក្សខាងលើនេះនៅ ព្រឹកថ្ងៃទី១០ ខែ ធ្នូ ឆ្នាំ២០២១ បាននិយាយឲ្យក្រុមអ្នកយកព័ត៌មានយើងដឹងថា រយៈពេល ២ ឆ្នាំកន្លងមកនេះលោក​បានជួលដីតាមមាត់បឹងនេះចំនួន១២ហិកតា ពីអ្នកស្រី ចាន់ណា ជាម្ចាស់ដីរស់នៅ ក្រុងភ្នំពេញ ដោយក្នុងមួយឆ្នាំគេយកថ្លៃឈ្នួលដីក្នុងមួយហិកតា ៦០ ម៉ឺនរៀល។ ចំណែកផលស្រូវដែលគាត់ទទួលបានវិញគឺក្នុងដី១២ ហិកតានេះ ក្នុង១ឆ្នាំទទួលបានផលស្រូវ ចំនួន ៤០តោន។

ទាក់ទងនឹងករណីខាងលើនេះលោក ចិន ផាន់ណា មេឃុំកោះថ្កូវនៅ ព្រឹកថ្ងៃទី ១០ ខែធ្នូនេះ បានប្រាប់តាមទូរស័ព្ទឱ្យដឹងថា កន្លងមកអាជ្ញាធរបានឲ្យលោកស្រី ចាន់ណា ធ្វើស្រែនៅ តាមខ្នងទួលជាប់នឹងបឹងតែប៉ុណ្ណោះ។ ដូច្នេះករណីបំពានលួចឈូសឆាយព្រៃតាមមាត់បឹងអភិរក្សខាងលើនេះធ្វើស្រែ ថ្ងៃស្អែកលោកនឹងហៅ អ្នកពាក់ព័ន្ធទាំងអស់នោះមកធ្វើការងារនេះ។ គឺតំបន់បឹងអភិរក្សដែលសហគមត្រូវការពារ មិនអនុញ្ញាតអ្នកណាមួយឈូសឆាយ និងកាន់កាប់យកធ្វើជាកម្មសិទ្ធិនោះឡើយ។

ដោយឡែកលោក ងិន ហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំង ក្រោយពីបានឃើញរូបថតដែលគេឈូសឆាយធ្វើស្រែតាមមាត់បឹងអភិរក្សតាមប្រ ព័ន្ធតេឡេក្រាមដែលក្រុមអ្នកសារ ព័ត៌មានយើងបានផ្ញើជូននៅថ្ងៃទី ១០ ខែធ្នូនេះ លោកបានបញ្ជាក់ប្រាប់ថា ករណីបំពានយកបឹងអភិរក្សខាងលើនេះ លោក និងសហការជាមួ យជំនាញមន្ទីរធនធានទឹក ចុះទៅពិនិត្យមើល និងចំណាត់ការតាមផ្លូវច្បាប់។ គឺបឹងអភិរក្សដែលត្រូវការពារដោយសហគមន៍នេសាទ មិនអនុញ្ញាតឲ្យបុគ្គលណាមួយលួចឈូ សឆាយទន្ទ្រានយកជាកម្មសិទ្ធិនោះឡើយ៕

អត្ថបទ៖ ឈៀង ថារិទ្ធ