៥ ថ្ងៃដំបូង រថភ្លើង ឡាវ-ចិន ទទួលបានអ្នកដំណើរជាង ៥ ពាន់នាក់

សារព័ត៌មាន CRI បានរាយការណ៍ថា មនុស្សជាង ៥,០០០ នាក់បានជិះរថភ្លើង ឡាវ-ចិន ចាប់តាំងពីផ្លូវដែកមួយនេះបានចាប់ផ្តើមបម្រើអ្នកដំណើរជាសាធារណៈនៅ ថ្ងៃទី ៤ ខែធ្នូ ដោយបានលក់សំបុត្រប្រហែល ៥,៥១២ សន្លឹក ។

នាយកស្ថានីយ៍ទីក្រុងវៀងច័ន្ទន៍ លោកស្រី Zhu Ying Hong បាននិយាយថា អ្នកដំណើរឡាវ និងបរទេសជាង ៥,០០០ នាក់បានប្រើប្រាស់សេវារថភ្លើង ចាប់តាំងពីវាបានចាប់ផ្តើមកាលពីសប្តាហ៍មុន ។

សេវាដឹកអ្នកដំណើរក្នុងស្រុកគឺដំណើរការ ២ ដងក្នុងមួយថ្ងៃ ជាមួយនឹងការធ្វើដំណើរទៅ មកពីរាជធានីវៀងច័ន្ទន៍ទៅ កាន់ទីក្រុង Boten និងរាជធានីវៀងច័ន្ទន៍ទៅ កាន់ខេត្ត Luang Prabang ។

អ្នកស្រី Zhu Yinghong បានបន្ថែមថា “យើងមានបុគ្គលិកឡាវ ៥១ នាក់ដែលមានសមត្ថភាពខ្លាំងធ្វើការនៅស្ថានីយ៍ទីក្រុងវៀងច័ន្ទន៍ ហើយវាគ្រប់គ្រាន់ដើម្បីបំពេញតម្រូវការសេវាកម្មមួយនេះ” ។

គួរបញ្ជាក់ថា សំបុត្រអាចរកទិញបាននៅ ស្ថានីយ៍ចំនួន ៦ គឺរាជធានីវៀងច័ន្ទន៍, ទីក្រុង Phonhong, ទីក្រុង Vang Vieng, ទីក្រុង Luang Prabang, ស្រុក Xai នៃខេត្ត Oudomxay និងស្ថានីយ Boten ខណៈពេលនេះរថភ្លើងអគ្គិសនី EMU ចំនួន ២ គ្រឿងកំពុងដំណើរការនៅ តាមបណ្តោយផ្លូវដែកមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Laotian Times