អ្នកជំនាញ ប្រាប់ឈ្មោះសារធាតុគីមី ដែលទំនងជាប្រើដើម្បីបំពុលលោក Abramovich (មានវីដេអូ)

លោក Roman Abramovich បានសួរថា តើយើងស្លាប់ទេ? បន្ទាប់​ពី​ត្រូវ​បាន​គេ​បំពុល​ដោយ​សារធាតុ​គីមី​នៅ​ក្នុង​កិច្ច​ចរចា​សន្តិភាព​អ៊ុយក្រែន និង​រុស្ស៊ី។

ក្រុមអ្នកជំនាញនិយាយថា អតីតម្ចាស់ក្លិបតោខៀវ Chelsea រូបនេះ មានរោគសញ្ញាធ្ងន់ធ្ងរ បន្ទាប់ពី ប៉ះពាល់ជាមួយសារធាតុគីមីសម័យសង្គ្រាមលោកលើកទីមួយ Chloropicrin ឬថ្នាំ Novichok កម្រិតទាប។

អ្នកកាសែតស៊ើបអង្កេត Christo Grozev ដែលដឹកនាំការស្រាវជ្រាវទៅលើឧបទ្ទវហេតុដ៏រន្ធត់នេះ បាននិយាយថា ក្រុមអ្នកជំនាញបានយល់ស្របថា សារធាតុគីមីដែលគេប្រើក្នុងសម័យសង្គ្រាម គឺទំនងជាត្រូវបានប្រើក្នុងការវាយប្រហារនេះ។

ចាប់តាំងពីពេលនោះមក មហាសេដ្ឋីរូបនេះមានអារម្មណ៍មិនស្រួលខ្លួន ទើបគាត់បានស្នើឲ្យក្រុមអ្នកវិទ្យាសាស្ត្រ ពិនិត្យមើលគាត់ថាតើគាត់អាចស្លាប់ឬក៏អត់។

លោក Abramovich និងអ្នកចរចាសន្តិភាពផ្សេងទៀត បានទទួលរងនូវរោគសញ្ញាធ្ងន់ធ្ងរ រួមទាំងងងឹតភ្នែកបណ្តោះអាសន្នផងដែរ ក្នុងបេសកកម្មកាលពីដើមខែមីនា ទៅកាន់ទីក្រុង កៀវ ដើម្បីស្វែងរកការបញ្ចប់សង្រ្គាម។

លោក Abramovich តម្រូវ​ឲ្យ​មាន​ការ​ព្យាបាល​នៅ​មន្ទីរពេទ្យ​ក្នុង​ទីក្រុង ​អ៊ីស្តង់ប៊ុល បន្ទាប់​ពី​បាន​ហោះ​ទៅ​ប្រទេស​តួកគី​ ចេញពី​កិច្ច​ពិភាក្សា​នៅ​អ៊ុយក្រែន។

នៅក្នុងបទសម្ភាសន៍ថ្មីមួយ លោក Grozov បានប្រាប់បណ្តាញ YouTube របស់ Popular Politics ថា អ្នកជំនាញទាំងអស់បានយល់ស្របថា ប្រភពទំនងបំផុតនៃរោគសញ្ញារបស់ពួកគេគឺសារធាតុ Chloropicrin ដែលជាសារធាតុប្រើក្នុងសង្គ្រាមគីមី អំឡុងសង្គ្រាមលោកលើកទីមួយ និងស្តុកទុកក្នុងសង្គ្រាមលោកលើកទីពីរ។

អ្នក​ជំនាញ​បាន​និយាយ​ថា នេះ​មិន​មែន​ជា​រឿង​ចៃដន្យ មិន​មែន​ជា​ការ​ពុល​អាហារ និងមិន​មែន​ជា​អាឡ័កស៊ីទេ។​ នេះជាសារធាតុ Chloropicrin។

ហើយអ្នកជំនាញខ្លះបានលើកឡើងថា នោះក៏អាចជាសារធាតុ Novichok ក្នុងកម្រិតទាប ដែលអាចនាំឲ្យលេចចេញរោគសញ្ញាទាំងនេះផងដែរ

ពួកគេទាំងអស់ក៏បានឯកភាពគ្នាដែរថា មធ្យោបាយតែមួយគត់ដើម្បីរកឃើញភ្នាក់ងារនេះគឺ ត្រូវនាំមនុស្សទាំងនេះទៅកាន់មន្ទីរពិសោធន៍ ឬបញ្ជូនសំណាកឈាមរបស់ពួកគេទៅកាន់មន្ទីរពិសោធន៍៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រដ្ឋមន្ត្រីការបរទេសរុស្ស៊ី ធ្វើទស្សនកិច្ច ចិន លើកដំបូង ចាប់តាំងពីសង្គ្រាមនៅអ៊ុយក្រែន ផ្ទុះឡើង