កម្ពុជាណែនាំ​ឲ្យ​មន្ត្រីការទូត​ធ្វើចត្តាឡីស័ក​ឲ្យ​ពេញ ១៤​ ថ្ងៃ

ភ្នំពេញ៖ រដ្ឋមន្ត្រីក្រសួងសុខាភិបាលបានណែនាំដល់អ្នកការទូត និងមន្ត្រីអង្គការអន្តរជាតិដែលកាន់ទិដ្ឋការការទួត «វីសា អេ»ត្រូវធ្វើចត្តាឡីស័ករយៈពេល១៤ថ្ងៃពេញលេញ ហើយរាល់ការចំណាយជាបន្ទុករបស់សាមីផ្ទាល់ខ្លួន។

លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានឲ្យដឹងនៅក្នុងសេចក្តីប្រកាសព័ត៌មានរបស់ក្រសួងចុះថ្ងៃទិ១៩ធ្នូនេះថា គណៈកម្មាធិការអន្តរក្រសួងដើម្បីប្រយុទ្ធនឹងជំងឺកូវីដ១៩ សូមជម្រាបជូនស្ថានតំណាងបរទេសប្រចាំកម្ពុជាអង្គការអន្តរជាតិនិងសាធារណជនទាំងអស់មេត្តាជ្រាបថា យោងតាមចំណារយល់ព្រមដ៏ខ្ពង់ខ្ពស់របស់សម្ដេចនាយករដ្ឋមន្ត្រីចុះថ្ងៃទី 18 ឆ្នាំ២០២០ ស្ដីពីការកែសម្រួលនូវវិធានការក្រសួងសុខាភិបាលនិងការធ្វើចត្តាឡីស័ករយៈពេល១៤ថ្ងៃពេញលេញចំពោះអ្នកការទូតនិងមន្រ្តីអង្គការអន្តរជាតិដែលកាន់ទិដ្ឋការការទួតវីសាអេ។

ក្នុងនោះត្រូវមានវិញ្ញាបនប័ត្របញ្ជាក់សុខភាពចេញដោយអាជ្ញាធរសុខាភិបាលទទួលស្គាល់ដោយប្រទេសសាមីដោយបញ្ជាក់ថាគ្មានកូវីដ19 មានសុពលភាពរយៈពេល ៧២ម៉ោងមុនពេលចេញដំណើរ។

លោករដ្ឋមន្ត្រីបានបន្តថា នៅពេលមកដល់កម្ពុជាអ្នកទាំងនោះត្រូវឆ្លងកាត់ការយកសំណាកទៅធ្វើតេស្តដោយក្រុមគ្រូពេទ្យវិជ្ជាជីវៈកម្ពុជា។ ស្ថានតំណាងបរទេសនិងក្រុមការងារអង្គការសហប្រជាជាតិនៅកម្ពុជា ត្រូវធានាលើការត្រួតពិនិត្យអោយបានហ្មត់ចត់ក្នុងការអនុវត្តរបស់អ្នកទទួលបានទិដ្ឋាការការទូតកម្ពុជា វីសារ អេ ការធ្វើចត្តាឡីស័ក១៤ថ្ងៃពេញលេញ។ ក្នុងករណីមានអ្នកដំណើរណាម្នាក់ដែលធ្វើតេស្តវិជ្ជមានវីរុសកូវីដ១៩ ក្រសួងសុខាភិបាលនឹងបញ្ជូនអ្នកវិជ្ជមាននោះ ទៅមន្ទីពេទ្យតាមការកំណត់របស់ក្រសួងសុខាភិបាល។

លោករដ្ឋមន្ត្រីបានបន្ថែមថាត្រូវធ្វើចត្តាឡិស័ក១៤ថ្ងៃពេញលេញនូវនោវេសនដ្ឋានរបស់ស្ថានទួតឬគេហដ្ឋានដាច់ដោយឡែកក្នុងករណីអ្នកការទូតដែលមិនស្នាក់នៅក្នុងនិវេសនដ្ឋានរបស់ស្ថានទួតឬគេហដ្ឋានដាច់ដោយឡែកត្រូវធ្វើចត្តាឡីស័ក១៤ថ្ងៃពេញលេញនៅសណ្ឋាគារហ៊ីម៉ាវ៉ារីនឹងស្ថិតនៅក្រោមការត្រួតពិនិត្យរបស់ស្ថានទូតអង្គការអន្តរជាតិសាមីនិងមន្ត្រីសុខាភិបាលដោយរាល់ការចំណាយទាំងអស់ជាបន្ទុករបស់សាមីខ្លួនផ្ទាល់។

លោករដ្ឋមន្ត្រីបានបញ្ចាក់ថាក្នុងអំឡុងពេលធ្វើចត្តាឡីស័ករយៈពេល១៤ថ្ងៃពេញលេញមិនអនុញ្ញាតឲ្យជួបភ្ញៀវឡើយហើយការធ្វើដំណើរពីព្រលានយន្តហោះទៅនិវាសនដ្ឋានរបស់ស្ថានទួតឬគេហដ្ឋានត្រូវប្រើប្រាស់តែមធ្យោបាយដឹកជញ្ជូនរបស់ស្ថានទូតឬអង្គការអន្តរជាតិប៉ុណ្ណោះ៕

អត្ថបទ៖ សំអឿន