ក្ដៅៗ កូរ៉េខាងត្បូង និងអាមេរិក បាញ់មីស៊ីល ៨ គ្រាប់ ឌឺ កូរ៉េខាងជើង វិញ (មានវីដេអូ)

កូរ៉េខាងត្បូង និងសហរដ្ឋអាមេរិកបានបាញ់មីស៊ីលចំនួន ៨ គ្រាប់វិញឆ្ពោះទៅកាន់សមុទ្រជប៉ុន ក្នុងគោលបំណងឌឺដងប្រទេសកូរ៉េខាងជើង បន្ទាប់ពីការបាញ់បង្ហោះមីស៊ីលរបស់ទីក្រុងព្យុងយ៉ាងកាលពីថ្ងៃអាទិត្យ ។

ការបាញ់មីស៊ីលពីសំណាក់កូរ៉េខាងត្បូង និងសហរដ្ឋអាមេរិកកើតឡើង បន្ទាប់ពីប្រទេសកូរ៉េខាងជើងបានបាញ់មីស៊ីលផ្លោងរយៈចម្ងាយខ្លីសរុបចំនួន ៨ គ្រាប់ពីទីតាំងចំនួន ៤ រួមទាំងពីតំបន់ Sunan ក្បែរទីក្រុងព្យុងយ៉ាង ឆ្ពោះទៅសមុទ្រខាងកើតក្នុងរយៈពេលជាង ៣០ នាទីប៉ុណ្ណោះ ។

ទីភ្នាក់ងារសារព័ត៌មាន Yonhap របស់កូរ៉េខាងត្បូងបាននិយាយថា កងកម្លាំងយោធាកូរ៉េខាងត្បូង និងសហរដ្ឋអាមេរិកបានបាញ់បង្ហោះកាំជ្រួចមីស៊ីល ATACMS ចំនួន ៨ គ្រាប់ដូចគ្នាក្នុងរយៈពេល ១០ នាទី ពីម៉ោង ៤ និង ៤៥ នាទីព្រឹកថ្ងៃចន្ទនេះ ។

Yonhap បានរាយការណ៍ទៀតថា កូរ៉េខាងត្បូងបានបាញ់កាំជ្រួច​មីស៊ីលចំនួន ៧ គ្រាប់​ ហើយ​មួយ​គ្រាប់ទៀតបាញ់ដោយ​កង​កម្លាំង​អាមេរិក ខណៈការបាញ់មីស៊ីលរួមគ្នានេះបានបង្ហាញពីសមត្ថភាព និងឥរិយាបថសំដៅទៅលើប្រភពដើមនៃការបង្កហេតុរបស់កងកម្លាំងសត្រូវ ។

គួរបញ្ជាក់ថា សហរដ្ឋអាមេរិក និងកូរ៉េខាងត្បូងនៅតែមានការប្រុងប្រយ័ត្នខ្ពស់ ចំពេលមានការព្រួយបារម្ភកាន់តែខ្លាំងឡើងថា កូរ៉េខាងជើងអាចនឹងធ្វើការបាញ់សាកល្បងអាវុធនុយក្លេអ៊ែរលើកទី ៧ របស់ខ្លួននាពេលខាងមុខ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មួយភ្លែត កូរ៉េខាងជើង បាញ់មីស៊ីល ៨ គ្រាប់ចូលសមុទ្រខាងកើត