រដ្ឋាភិបាលចំណាយថវិកាជាង ៧៤០លានដុល្លារ​ឧបត្ថម្ភដល់ពលរដ្ឋក្រីក្រនិងងាយរងគ្រោះក្នុងអំឡុងពេលផ្ទុះកូវីដ-១៩

រហូតមកដល់ពេលនេះ រាជរដ្ឋាភិបាល បានឧបត្ថម្ភថវិកា ជូនដល់ពលរដ្ឋក្រីក្រ និងងាយរងគ្រោះ ក្នុងអំឡុងពេល​ផ្ទុះជំងឺកូវីដ-១៩ ប្រមាណជាង ៧៤០លានដុល្លារអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីជួនដំណឹងរបស់ក្រសួងសង្គមកិច្ច អតីតយុទ្ធជន និងយុវនីតិសម្បទាចុះថ្ងៃទី២៤កក្កដាបានឱ្យដឹងថា ចាប់ពីថ្ងៃទី២៥ខែមិថុនាឆ្នាំ២០២០ រហូតមកដល់ថ្ងៃទី២៤ខែកក្កដាឆ្នាំ២០២២នេះ រាជរដ្ឋាភិបាលបានឧបត្ថម្ភថវិកា​ដល់ពលរដ្ឋក្រីក្រនិងងាយរងគ្រោះ ក្នុងអំឡុងពេលផ្ទុះជំងឺកូវីដ-១៩ប្រមាណជិត៧០ម៉ឺននាក់ បានចំនួន២៥លើក ដោយចំណាយថវិកាអស់ ២ ៩៧៨ ៤០៧ ៥៩៩ ០០០រៀល ស្មើនឹងប្រមាណ ៧៤៤,៦០លានដុល្លារអាមេរិក។

ក្នុងនោះ សម្រាប់ជុំទី៩លើកទី៣ ដែលរាជរដ្ឋាភិបាល បានអនុវត្តចាប់ពីថ្ងៃទី ២៥ ខែមិថុនាឆ្នាំ ២០២២ ដល់ថ្ងៃទី ២៤ ខែកក្កដាឆ្នាំ ២០២២ មានរយៈពេល ៣០ថ្ងៃប្រមាណ ១២២ ០៦៤ ៨២៨ ០០០រៀល ស្មើនឹងប្រមាណជាង ៣០លានដុល្លារអាមេរិក។

ក្រសួងសង្គមកិច្ច បានណែនាំដល់បងប្អូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងកូវីដ-១៩ ទៅទទួលសាច់ប្រាក់ ៣០ថ្ងៃបន្តទៀត ពីរាជរដ្ឋាភិបាលតាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា នៅតាមូលដ្ឋានដែលធ្លាប់បើកសាច់ប្រាក់ជុំទី១០ លើកទី១ ចាប់ពីថ្ងៃទី២៥ខែកក្កដានេះ រហូតដល់ថ្ងៃទី ២៤ខែសីហាឆ្នាំ២០២២។

ក្រសួងសង្គមកិច្ចបានបន្តទៀតថា ពេលទៅបើកប្រាក់ឧបត្ថម្ភនៅតាមបញ្ជរវីង តម្រូវឱ្យអ្នកទទួលផល ត្រូវភ្ជាប់​ទៅជាមួយនូវឯកសារពាក់ព័ន្ធដូចគ្នានឹងការបើកប្រាក់ឧបត្ថម្ភលើកមុនៗផងដែរ ពិសេសបណ្ណសមធម៌ ដែលនៅមានសុពលភាព និងត្រូវចងចាំលេខកូដសម្ងាត់។ ករណីភ្លេចលេខសម្ងាត់ សូមទំនាក់ទំនងអ្នកទទួល​បន្ទុកកម្មវិធីនៅតាមឃុំ សង្កាត់ ឬ មន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានី ខេត្ត ។

ក្នុងករណីប្រជាពលរដ្ឋ ឬសាធារណជន ពិនិត្យឃើញភាពមិនប្រក្រតីណាមួយក្នុងការអនុវត្តកម្មវិធី ឬដកសាច់ប្រាក់​មិនបាននៅតាមបញ្ជរវីងណាមួយនោះ សូមសាធារណជន និងអ្នកទទួលផលទាំងអស់ ធ្វើការទំនាក់ទំនង​ជាមួយអ្នកកាន់កម្មវិធីនៅតាមឃុំ សង្កាត់ ឬ នៅមន្ទីរសង្គមកិច្ច អតីតយុទ្ធជន និងយុវនីតិសម្បទា ឬ មន្ទីរផែនការ រាជធានី ខេត្តនីមួយៗ៕សំអឿន