រដ្ឋមន្រ្តីការបរទេសជប៉ុន ប៉ងភ្លក់រសជាតិម្ហូបខ្មែរ​អាម៉ុក ពេលមកទស្សនកិច្ចនៅកម្ពុជាស្អែកនេះ

លោក ហាយ៉ាស៊ិ យ៉ុស៊ិម៉ាសា រដ្ឋមន្រ្តីការបរទេសជប៉ុន នឹងមកបំពេញដំណើរទស្សនកិច្ចនៅកម្ពុជា ជាលើកដំបូងចាប់ពីថ្ងៃស្អែកនេះតទៅ។ មុនមកដល់កម្ពុជា លោករដ្ឋមន្រ្តីការបរទេសជប៉ុន បានបង្ហើបប្រាប់ថា លោកគឺជាអ្នកគាំទ្រម្ហូបខ្មែរមួយរូប ដែលតែងតែទៅភោជនីយដ្ឋានខ្មែរក្នុងទីក្រុងតូក្យូជាញឹកញាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈស្ថានទូតជប៉ុនប្រចាំកម្ពុជា លោក ហាយ៉ាស៊ិ យ៉ុស៊ិម៉ាសា បានលើកឡើងដូច្នេះថា« លោក លោកស្រី ក្មួយៗជាទីមេត្រី តើជ្រាបទេថា ខ្ញុំបានចង់សាកល្បងអ្វី ក្នុងដំណើរទស្សនកិច្ចនេះ? ខ្ញុំជាអ្នកគាំទ្រម្ហូបខ្មែរ ដែលខ្ញុំបានទៅភោជនីយដ្ឋានខ្មែរក្នុងទីក្រុងតូក្យូជាញឹកញាប់។ ពេលនេះខ្ញុំទន្ទឹងរង់ចាំភ្លក់រសជាតិ​ដើមកំណើតនៃម្ហូបខ្មែរដូចជាអាម៉ុក»។

ជាមួយគ្នានេះលោក ហាយ៉ាស៊ិ យ៉ុស៊ិម៉ាសា បានលើកឡើងទៀតថា គឺមានបំណងបញ្ជាក់អំពីទំនាក់ទំនងដ៏រឹង​មាំរវាងប្រទេសកម្ពុជា និងជប៉ុន។　　នាខែមីនាកន្លងទៅនេះ លោកនាយករដ្ឋមន្ត្រី គិស៊ិដា បានធ្វើទស្សនកិច្ចនៅកម្ពុជា ហើយនាយករដ្ឋមន្ត្រីនៃប្រទេសទាំងពីរបានចេញសេចក្តីថ្លែងការណ៍រួមដោយបង្ហាញពីទិសដៅនៃកិច្ចសហប្រតិបត្តិការនាពេលអនាគត។ ប្រទេសជប៉ុន　នឹងបន្តខិតខំធ្វើការដើម្បីអនុវត្តសេចក្តីថ្លែងការណ៍រួមឲ្យចេញជាសហប្រតិបត្តិការ​ជាក់ស្តែងជាមួយប្រជាជនកម្ពុជា។ ក្នុងដំណើរទស្សនកិច្ចនេះ លោក ហាយ៉ាស៊ិ យ៉ុស៊ិម៉ាសា នឹងជួបពិភាក្សា​ជាមួយលោក ប្រាក់ សុខុន ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលជាសមភាគីរបស់លោក ជាពិសេសអំពី វិវត្តន៍នៃគម្រោងអភិវឌ្ឍន៍កំពង់ផែស្វយ័តក្រុងព្រះសីហនុ ដែលជាកំពង់ផែស្នូលរបស់កម្ពុជា និងកិច្ចសហប្រតិបត្តិការលើវិស័យសន្តិសុខ។

លើសពីនេះទៀត លោករដ្ឋមន្រ្តីការបរទេសជប៉ុន ក៏នឹងចូលរួមកិច្ចប្រជុំរដ្ឋមន្ត្រីការបរទេសដែល​ពាក់ព័ន្ធក្នុងក្រប​ខណ្ឌអាស៊ានផងដែរ៕