៣ប្រទេស ព្រមានឆ្លើយតបចាស់ដៃ បើកូរ៉េខាងជើង ហ៊ាន​សាកល្បង​នុយក្លេអ៊ែរ​

ទីប្រឹក្សាសន្តិសុខជាតិកូរ៉េខាងត្បូង បាននិយាយថា លោក ព្រមទាំងសមភាគីអាមេរិក និងជប៉ុន បានព្រមព្រៀងគ្នាថា នឹងធ្វើការឆ្លើយតបចាស់ដៃ ប្រសិនបើកូរ៉េខាងជើង ធ្វើតេស្តនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Kim Sung-han បានព្រមានបែបនេះនៅរដ្ឋ Hawaii ជាកន្លែងដែលលោកបានជួបពិភាក្សាលក្ខណៈត្រីភាគី ជាមួយទីប្រឹក្សាសន្តិសុខជាតិអាមេរិក Jake Sullivan និងលោក Akiba Takeo នៃប្រទេសជប៉ុន ចំពេលមានសញ្ញាថា ប្រទេសកូរ៉េខាងជើង បានត្រៀមលក្ខណៈរួចរាល់ហើយដើម្បីធ្វើការសាកល្បងនុយក្លេអ៊ែរជាលើកដំបូងចាប់តាំងពីឆ្នាំ ២០១៧មក។

លោក Kim បានប្រាប់អ្នកយកព័ត៌មានកាលពីថ្ងៃព្រហស្បតិ៍ទី០១ខែកញ្ញា បន្ទាប់ពីកិច្ចពិភាក្សាត្រីភាគីនេះថា “ប្រសិនបើកូរ៉េខាងជើងធ្វើការសាកល្បងនុយក្លេអ៊ែរលើកទីប្រាំពីររបស់ខ្លួនមែននោះ ច្បាស់ណាស់ ការឆ្លើយតបនឹងខុសគ្នាពីអតីតកាល”។

គួរបញ្ជាក់ថា ប្រទេសកូរ៉េខាងជើង​ដែល​មាន​អាវុធ​នុយក្លេអ៊ែរ​ បាន​ធ្វើ​ការ​សាកល្បងមីស៊ីល​ក្នុងកម្រិត​មិន​ធ្លាប់​មានពីមុនមក​ក្នុង​ឆ្នាំ​នេះ។

កាលពីពាក់កណ្តាលខែសីហា កូរ៉េខាងជើង បានបាញ់មីស៊ីលឆ្លងទ្វីបចំនួន២គ្រាប់ ពីឆ្នេរសមុទ្រភាគខាងលិច បន្ទាប់ពីកូរ៉េខាងត្បូង និងសហរដ្ឋអាមេរិក បានចាប់ផ្តើមធ្វើសមយុទ្ធឡើងវិញលើទីលានដ៏ធំបំផុតក្នុងរយៈពេលប៉ុន្មានឆ្នាំកន្លងមកនេះ។

​ជា​យូរ​មក​ហើយ ទីក្រុង​ព្យុងយ៉ាង ​បាន​បរិហារ​សមយុទ្ធនោះ ​ថា​ជា​ការ​ហាត់​សម​សម្រាប់​សង្គ្រាម៕

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េ ខាង ជើង បាញ់ មីស៊ីល ផ្លោង ពីរ គ្រាប់ ចូលសមុទ្រ មួយថ្ងៃបន្ទាប់ពី កូរ៉េខាងត្បូង និងអាមេរិក ធ្វើសមយុទ្ធ