កូរ៉េ​ខាង​ជើង ​បាញ់​មីស៊ីល​ផ្លោង​ពីរ​គ្រាប់ ចូលសមុទ្រ មួយថ្ងៃបន្ទាប់ពី កូរ៉េខាងត្បូង និងអាមេរិក ធ្វើសមយុទ្ធ 

ប្រភពយោធាកូរ៉េខាងត្បូងបានប្រាប់ទីភ្នាក់ងារសារព័ត៌មាន Yonhap ថា ប្រទេសកូរ៉េខាងជើង បានបាញ់មីស៊ីលផ្លោងចំនួនពីរគ្រាប់ ចេញពីឆ្នេរសមុទ្រភាគខាងលិចរបស់ខ្លួន ចូលទៅក្នុងសមុទ្រលឿងកាលពីព្រឹកថ្ងៃពុធទី១៧ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបាញ់សាកល្បងនេះ បានកើតឡើងចំពេល ប្រធានាធិបតីកូរ៉េខាងត្បូងលោក Yoon Suk-yeol កំពុងធ្វើសន្និសីទកាសែត ដើម្បីកត់សម្គាល់រយៈពេល១០០ថ្ងៃ ចាប់តាំងពីគាត់ចូលកាន់តំណែង។

ការបាញ់នេះក៏បានកើតឡើងមួយថ្ងៃផងដែរ បន្ទាប់ពីទាហានកូរ៉េខាងត្បូង និងអាមេរិក ចាប់ផ្តើមសមយុទ្ធបឋម មុនសមយុទ្ធប្រចាំឆ្នាំ Ulchi Freedom Shield (UFS)។

ទីក្រុងព្យុងយ៉ាង បានរិះគន់ម្តងហើយម្តងទៀតចំពោះសមយុទ្ធយោធារួមគ្នារវាងទីក្រុងសេអ៊ូល និងទីក្រុងវ៉ាស៊ីនតោន ដោយចាត់ទុកពួកគេថាជាការបង្កហេតុ ហើយអះអាងថា ពួកគេគ្រាន់តែបង្កើនភាពតានតឹងនៅលើឧបទ្វីបកូរ៉េប៉ុណ្ណោះ។

កូរ៉េខាងជើង​ ត្រូវបាន​ហាមប្រាម​មិនឲ្យ​បាញ់​មី​ស៊ី​ល​ផ្លោង ​ក្រោម​សេចក្តីសម្រេច​របស់​ក្រុមប្រឹក្សាសន្តិសុខ​អង្គការសហប្រជាជាតិ។

គួរបញ្ជាក់ថា ទីក្រុងព្យុងយ៉ាង បានបាញ់សាកល្បងមីស៊ីលផ្លោងលើកចុងក្រោយបំផុត កាលពីខែមករាឆ្នាំនេះ៕

ប្រែសម្រួល៖ Vann Vann

ប្រភព៖ RT

ចុចអាន៖ កូរ៉េខាងត្បូង ចាំតែជួយ កូរ៉េខាងជើង ប៉ុណ្ណោះ បើរំសាយអាវុធនុយក្លេអ៊ែរ