ស្ថានការណ៍នៅរុស្ស៊ីកំពុងក្តៅ! បាញ់សម្លាប់រង្គាលក្នុងសាលា, បាញ់មេបញ្ជាការកែនទាហាន និងបាតុករដុតខ្លួនឯង (មានវីដេអូ)

អាជ្ញាធរនិយាយថា ខ្មាន់កាំភ្លើងម្នាក់បានបើកការបាញ់ប្រហារក្នុងសាលារៀនមួយ នៅកណ្តាលប្រទេសរុស្ស៊ី ដោយបានសម្លាប់មនុស្សរហូតដល់ ១៧នាក់ដោយក្នុងនោះមានកុមារ ១១ នាក់ និង ២៤នាក់ផ្សេងទៀតរងរបួស មុនពេលបាញ់សម្លាប់ខ្លួនឯង។

ការបាញ់ប្រហារនេះបានកើតឡើងកាលពីថ្ងៃចន្ទទី២៦ខែកញ្ញា ក្នុងសាលាលេខ៨៨ នៅទីក្រុង Izhevsk មានចម្ងាយ ៩៦០គីឡូម៉ែត្រ ភាគខាងកើតទីក្រុងមូស្គូ។

គណៈកម្មាធិការស៊ើបអង្កេតរុស្ស៊ី បានកំណត់អត្តសញ្ញាណខ្មាន់កាំភ្លើងថា មានឈ្មោះ Artyom Kazantsev អាយុ៣៤ឆ្នាំ ជាសិស្សបញ្ចប់ការសិក្សានៅសាលានេះតែម្តង។ គាត់ពាក់អាវយឺតពណ៌ខ្មៅ មាននិមិត្តសញ្ញា ណាស៊ី។

ទោះបីជាយ៉ាងណាក៏ដោយ មិនមានព័ត៌មានលម្អិតអំពីហេតុផល នៅពីក្រោយការបាញ់ប្រហារនេះទេ។

ស្របពេលជាមួយគ្នានោះ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានថ្កោលទោសការវាយប្រហារនេះថាជា “អំពើអមនុស្សធម៌”។

ឆ្មាំជាតិរុស្ស៊ីនិយាយថា លោក Kazantsev បានប្រើកាំភ្លើងខ្លីកែច្នៃក្នុងការវាយប្រហារ ហើយកាំភ្លើងនេះ​មិន​បាន​ចុះ​បញ្ជី​ជាមួយ​អាជ្ញាធរនោះ​ទេ។

ការវាយប្រហារនេះកើតឡើងចំពេលដ៏សំខាន់មួយសម្រាប់រុស្ស៊ី ដែលកំពុងធ្វើសង្រ្គាមនៅអ៊ុយក្រែន ហើយថ្មីៗនេះ បានប្រកាសពីបទបញ្ជាកែនទ័ពដើម្បីបង្កើនកម្លាំងរបស់ខ្លួន។

ប៉ុន្មានម៉ោងមុនការបាញ់ប្រហារនៅសាលា បុរសម្នាក់បានបើកការបាញ់ប្រហារ និងបណ្តាលឲ្យមេបញ្ជាការកែនទាហានម្នាក់រងរបួស នៅឯមជ្ឈមណ្ឌលចុះឈ្មោះក្នុងតំបន់ស៊ីបេរី។

ហើយ​បុរស​ម្នាក់​ទៀត ​បាន​ដុត​ខ្លួនឯង​ជា​ការ​តវ៉ា ខណៈ​ដែល​ការ​ប្រឆាំង​នឹងបញ្ជាកែនទ័ព​របស់​លោក វ្ល៉ាឌីមៀរ ពូទីន ​កាន់តែ​រីកធំឡើងៗ។

បាតុកម្មក៏បានបន្តសម្រាប់ថ្ងៃទី៣ផងដែរ នៅក្នុងតំបន់ Dagestan របស់រុស្ស៊ី ដោយនៅទីនោះក្រុមមន្រ្តី បានបាញ់កាំភ្លើងស្វ័យប្រវត្តិឡើងលើអាកាស ដើម្បីបំបែកហ្វូងមនុស្សដែលមានកំហឹង។ ទន្ទឹមនឹងនេះ រថយន្តរាប់ពាន់គ្រឿងបានតម្រង់ជួរនៅព្រំដែនរុស្ស៊ី ដោយដឹកយុវជនដែលកំពុងព្យាយាមរត់ចេញពីប្រទេស ដើម្បីគេចពីការកែនទ័ព៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Aljazeera, The Guardian

ចុចអាន៖ តំបន់អ៊ុយក្រែនចំនួន៤ ចាប់ផ្តើមធ្វើប្រជាមតិស្តីពីការចូលរួមជាមួយ រុស្ស៊ី ហើយ