រុស្ស៊ី ចោទថា លោក Zelensky ព្យាយាមបញ្ឆេះ សង្គ្រាមលោកលើកទី៣ (មានវីដេអូ)

វិមានក្រឹមឡាំង បានចោទប្រកាន់ប្រធានាធិបតីអ៊ុយក្រែន លោក Vladimir Zelensky ថា បានព្យាយាមបញ្ឆេះឲ្យមានសង្គ្រាមលោកលើកទី៣ បន្ទាប់ពីលោកបានទាមទារឲ្យអង្គការណាតូ បើកការវាយប្រហារលើប្រទេសរុស្ស៊ី ដើម្បីរារាំងការប្រើប្រាស់អាវុធនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់វិទ្យាស្ថាន Australian Lowy Institute កាលពីថ្ងៃព្រហស្បតិ៍ទី០៦ខែតុលា លោក Zelensky បានបញ្ជាក់ថា អង្គការណាតូ ត្រូវតែធានាថា ទីក្រុងមូស្គូមិនប្រើប្រាស់នុយក្លេអ៊ែរប្រឆាំងនឹងកងកម្លាំងរបស់ទីក្រុងកៀវនោះទេ ។ ដើម្បីធ្វើដូច្នេះបាន លោកអំពាវនាវដល់ប្លុកយោធាដែលដឹកនាំដោយសហរដ្ឋអាមេរិក និងសហគមន៍អន្តរជាតិ ត្រូវបើកការវាយប្រហារបង្ការប្រឆាំងនឹងរុស្ស៊ី។

ក្នុងអំឡុងសន្និសីទអនឡាញនោះ លោក Zelensky និយាយថា “តើ ណាតូ គួរធ្វើអ្វី? ខ្ញុំ​សូម​អំពាវនាវ​ជាថ្មីម្ដង​ទៀត​ទៅ​សហគមន៍​អន្តរជាតិ ដូច​ជា​មុន​ថ្ងៃ​ទី២៤ខែ​កុម្ភៈដែរ៖ ត្រូវវាយប្រហារ​ជា​មុន ដើម្បី​ឲ្យរុស្ស៊ីដឹង​ថា ​នឹង​មាន​អ្វី​កើត​ឡើង​ចំពោះ​ពួកគេ ប្រសិន​បើ​ពួកគេ​ប្រើប្រាស់អាវុធនុយក្លេអ៊ែរ”។

ទីក្រុងមូស្គូបានថ្កោលទោសចំពោះការលើកឡើងរបស់ លោក Zelensky ដោយអ្នកនាំពាក្យវិមានក្រឹមឡាំង លោក Dmitry Peskov បញ្ជាក់ថា ការលើកឡើងរបស់មេដឹកនាំអ៊ុយក្រែន គឺគ្មានអ្វីក្រៅពីការប៉ុនប៉ងបង្កសង្គ្រាមលោក ដែលនឹងនាំឲ្យមានផលវិបាកមហន្តរាយដែលមិនអាចទាយទុកជាមុនបាននោះទេ។

ក្រសួងការបរទេសរុស្ស៊ី ក៏បានចោទប្រកាន់លោក Zelensky ពីការព្យាយាមបង្កសង្គ្រាមនុយក្លេអ៊ែរផងដែរ ដោយអ្នកនាំពាក្យលោកស្រី Maria Zakharova បាននិយាយថា “មនុស្សគ្រប់រូបនៅលើភពផែនដីគួរតែទទួលស្គាល់ថា មេដឹកនាំអាយ៉ងគ្មានតុល្យភាពរបស់អ៊ុយក្រែន បានប្រែក្លាយទៅជាបិសាច អាចបំផ្លាញភពផែនដីបាន។

ស្របពេលជាមួយគ្នានោះ វិមានក្រឹមឡាំងបានអំពាវនាវឲ្យសហគមន៍អន្តរជាតិ យកចិត្តទុកដាក់ឲ្យមែនទែនចំពោះសេចក្តីថ្លែងការណ៍របស់លោក Zelensky ជាពិសេសសហរដ្ឋអាមេរិក និងចក្រភពអង់គ្លេស ដែលលោក Peskov និយាយថា ជាអ្នកគ្រប់គ្រងសកម្មភាពរបស់ទីក្រុងកៀវ ដូច្នេះហើយត្រូវទទួលខុសត្រូវចំពោះពាក្យសម្ដីរបស់ប្រធានាធិបតីអ៊ុយក្រែន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ពូទីន ចុះហត្ថលេខា ដាក់បញ្ចូលអតីតតំបន់អ៊ុយក្រែនចំនួន ៤ ជាទឹកដីរបស់រុស្ស៊ី ជាផ្លូវការ