អាជ្ញាធរខេត្តកំពង់ធំ នឹងរៀបចំពីធីអុំទូកនៅដើមខែវិច្ឆិកា ឆ្នាំ២០២២ ខាងមុខនេះ

អាជ្ញាធរខេត្តកំពង់ធំ នឹងរៀបចំកម្មវិធីបុណ្យអុំទូក និងបណ្តែតប្រទីប ថ្នាក់ខេត្ត នៅដើមខែវិច្ឆិកា ឆ្នាំ២០២២នេះ ក្រោយពីសង្កេតឃើញថា ស្ថានភាពទឹកស្ទឹងសែនបានស្រកចុះ។

នៅថ្ងៃទី១៨ ខែតុលា ឆ្នាំ២០២២ អាជ្ញាធរខេត្តកំពង់ធំ ចេញសេចក្តីជូនដំណឹងសាជាថ្មី ដែលនឹងចាប់រៀបចំកម្មវិធីបុណ្យអុំទូក និងបណ្តែតប្រទីបថ្នាក់ខេត្ត នៅថ្ងៃទី៣ និងទី៤ ខែវិច្ឆិកា ឆ្នាំ២០២២ ខាងមុខ។ សេចជូនដំណឹងបញ្ជាក់ថា ការរៀបចំកម្មវិធីនេះ ដោយសារសង្កេតឃើញថា ស្ថានភាពស្ទឹងសែន នៅក្នុងខេត្តកំពង់ធំ បានស្រកចុះជាបន្តបន្ទាប់ នៅស្ថានីយ៍សណ្តាន់ និងស្ថានីយ៍កំពង់ធំ ត្រង់ទីតាំងដែលអាចដំណើរការរៀបចំកម្មវិធីបាន។ ហើយនេះគឺជាការជូនដំណឹងលើកទី២ បន្ទាប់ពីផ្អាកកម្មវិធីអុំទូក កាលពីថ្ងៃទី៩ និង១០ ខែតុលា កន្លងទៅ មូលហេតុដោយសារស្ថានភាពទឹកជំនន់។

រដ្ឋបាលខេត្តកំពង់ធំ នឹងរៀបចំកម្មវិធីនៅត្រង់ចំណុចស្ពានស្ទឹងសែន ដែលអមដោយសួនច្បារធំទូលាយ ដែលមានបរិវេណសួន ស្ទឹងសែន សួនសម្តេចតេជោ និងវេរ៉ងដា សាងសង់ថ្មីដោយឯកឧត្តម ងួន រតនៈ អភិបាលខេត្តកំពង់ធំ ដើម្បីបង្ករបរិយាកាសសប្បាយរីករាយ រំសាយទុក្ខកង្វល់ប្រជាពលរដ្ឋទូទៅក្រោយពេលគ្រោះទឹកជំនន់បានបញ្ចប់។

កម្មវិធីនេះ មានទូកចូលរួមប្រកួតសរុបចំនួន៤២ទូក មានចំណុះសរុប ១,២៣១នាក់ មកពីប្រាំបួន ក្រុង ស្រុក ទូទាំងខេត្តកំពង់ធំ ក្នុងនោះទូកវែង “ទូក ង” ចំនួន៥ (ទូកមួង ១), ទូកខ្នាតអន្តរជាតិ ចំនួន១៦ ទូក, ទូកផ្កាចារ្យមាន ចំនួន២១ ទូក៕

អត្ថបទ៖ ឈាង មករា