វៀតណាម ថា បំណុលជំពាក់បរទេសនឹងកើនឡើង ២០ ភាគរយក្នុងឆ្នាំនេះ

វៀតណាម គ្រោងខ្ចីលុយបរទេសប្រមាណ ២៥.២ ពាន់លានដុល្លារបន្ថែមទៀតនៅក្នុងឆ្នាំនេះ ដែលអាចធ្វើឲ្យបំណុលបរទេសរបស់វៀតណាមកើនឡើង ២០.៥ ភាគរយបន្ថែមពីឆ្នាំ ២០២១ ។

គិតត្រឹមរយៈពេល ៩ ខែនៅក្នុងឆ្នាំ ២០២២ នេះ វៀតណាម បានខ្ចីបំណុលបរទេសប្រមាណ ១៨៥ លានដុល្លារ ជាមួយអត្រាការប្រាក់ ០.១ ភាគរយក្នុងរយៈពេល ៤០ ឆ្នាំ ហើយនៅក្នុងត្រីមាសចុងក្រោយនេះ វៀតណាមនឹងគ្រោងខ្ចី ១៨៨ លានដុល្លារបន្ថែមទៀតផងដែរ ។

ទោះជាបំណុលកើនឡើងក្តី ប៉ុន្តែវៀតណាមក៏បានប្រកាសឲ្យដឹងដែរថា គឺស្ថិតនៅក្រោមការគ្រប់គ្រងបាន ខណៈ ក្នុងឆ្នាំនេះ វៀតណាម នឹងត្រូវសងបំណុលសរុប ៣២៤.៥៨ ទ្រីលានដុង ។

ស្របពេលជាមួយគ្នានេះ បន្ទាប់ពីវៀតណាមក្លាយជាប្រទេសដែលមានប្រាក់ចំណូលមធ្យម, កម្ចីបរទេសក៏កាន់តែខិតជិតអត្រាទីផ្សារ ខណៈចាប់តាំងពីដើមឆ្នាំ ២០២២ ដោយសារតែលក្ខខណ្ឌមិនអំណោយផលនៅក្នុងទីផ្សារមូលធនអន្តរជាតិនេះហើយ បានធ្វើឲ្យអត្រាមូលប័ណ្ណបំណុលវៀតណាម កើនឡើង ២.៧៩ ទៅ ៣.២៧ ភាគរយ ។

ម្យ៉ាងទៀត ការធ្លាក់ចុះនៃប្រាក់ដុង ក៏ជាការបង្កើនសម្ពាធលើការផ្តល់សេវាបំណុលផងដែរ ជាពិសេសការកំណត់លើប្រាក់ដុល្លារ ៕

ប្រែសម្រួលដោយ ៖ នាង រតនៈ

ប្រភព ៖ VN Express

ចុចអាន ៖ វៀតណាម ពង្រីកការជួញដូរលុយ ដុង ខណៈរូបិយប័ណ្ណរបស់ខ្លួនធ្លាក់ក្នុង​អត្រាទាបបំផុត