លោក Putin នឹងមិនចូលរួមកិច្ចប្រជុំកំពូល G20 នៅ ឥណ្ឌូណេស៊ី ឡើយ

ប្រធានាធិបតីរុស្ស៊ីលោក Vladimir Putin នឹងមិនចូលរួមកិច្ចប្រជុំកំពូល G20 ជាមួយមេដឹកនាំពិភពលោកនៅកោះ Bali ប្រទេសឥណ្ឌូណេស៊ី នាសប្តាហ៍ក្រោយនេះឡើយ ដោយឲ្យលោក​ Sergey Lavrov រដ្ឋមន្ត្រីការបរទេស ទៅចូលរួមជំនួសវិញ ។

ទោះបីជាលោក Putin​ មិនបានចូលរួមកិច្ចប្រជុំដោយផ្ទាល់ក៏ដោយ ប៉ុន្តែមន្ត្រីការទូតរុស្ស៊ីប្រចាំនៅ​ឥណ្ឌូណេស៊ី​ និយាយថា លោកប្រធានាធិបតីរុស្ស៊ីរូបនេះ​ នឹងអាចចូលរួមប្រជុំបានតាមរយៈ​វីដេអូខល ។

ជាមួយគ្នានោះ​ លោក Volodymyr Zelensky ប្រធានាធិបតីអ៊ុយក្រែន ដែលក៏ត្រូវបានអញ្ជើញឲ្យចូលរួមកិច្ចប្រជុំកំពូលនេះផងដែរនោះ និយាយថា​ លោកនឹងមិនចូលរួមឡើយ បើសិនជាមានវត្តមានលោក Putin ។

ដោយឡែក ប្រធានាធិបតីចិនលោក Xi Jinping និងប្រធានាធិបតីសហរដ្ឋអាមេរិកលោក Joe Biden ស្ថិតក្នុងចំណោមមេដឹកនាំពិភពលោកដែលគេរំពឹងថា នឹងធ្វើដំណើរទៅចូលរួមកិច្ចប្រជុំកំពូល G20 ដែលរៀបចំឡើងនៅថ្ងៃទី ១៥-១៦ ខែវិច្ឆិកា ឆ្នាំ ២០២២ ។

គួរបញ្ជាក់ថា កិច្ចប្រជុំកំពូល G20 ដែលប្រមូលផ្តុំមេដឹកនាំនៃប្រទេសចំនួន ១៩ និងសហភាពអឺរ៉ុប ត្រូវបានគេរំពឹងថា នឹងផ្ដោតសំខាន់ទៅលើសង្រ្គាមលុកលុយនៅអ៊ុយក្រែន ដែលបានជំរុញឲ្យមានការខ្វះខាតស្បៀងអាហារ និងប្រេងឥន្ធនៈជាសកល ៕

ប្រែសម្រួលដោយ ៖ នាង រតនៈ

ប្រភព ៖ Al Jazeera

ចុចអាន ៖ លោក Zelensky ដាក់លក្ខខណ្ឌ ៣ ចំណុចសម្រាប់ការចរចាសន្តិភាពជាមួយ រុស្ស៊ី