គម្រោងជួសជុលជណ្តើរបុរាណខាងជើង ប្រាសាទព្រះវិហារ បញ្ចប់ ដំណាក់កាលទី៣

មកដល់ពេលនេះ អាជ្ញាធរជាតិព្រះវិហារ បានបញ្ចប់គម្រោងជួសជុលជណ្តើរបុរាណខាងជើង ប្រាសាទព្រះវិហារ ដំណាក់កាលទី៣​ ក្រោមជំនួយថវិកា​មូលនិធិឯកអគ្គរដ្ឋទូតសហរដ្ឋអាមេរិក ដើម្បីអភិរក្សសម្បត្តិវប្បធម៌​ កាលពីពាក់កណ្តាលខែវិច្ឆិកា ឆ្នាំ២០២២ ដោយសម្រេចបានលទ្ធផលដូចខាងក្រោម៖

១. អភិរក្ស និងជួសជុលជណ្តើរបុរាណខាងជើងពីថ្នាក់ទី៦ ដល់ទី៧

២. អភិរក្ស និងជួសជុលចម្លាក់តោចំនួន ២

៣. រៀបចំប្រព័ន្ធរំដោះទឹកខាងក្រោមកាំជណ្តេីរ និងសងខាងជណ្តេីរបុរាណ

៤. ផ្សព្វផ្សាយកម្មវិធីអប់រំបេតិកភ័ណ្ឌដល់សិស្សសាលា

គួរបញ្ជាក់ថា ដំណាក់កាលទី១ (ឆ្នាំ២០១៨-២០១៩) អាជ្ញាធរជាតិព្រះវិហារ បានសិក្សា និងវិភាគហានិភ័យផ្នែកស្ថាបត្យកម្ម នៃជណ្តើរបុរាណខាងជើងទាំងមូល ធ្វើកំណាយស្រាវជ្រាវបុរាណវិទ្យា សិក្សា និងរៀបចំប្រព័ន្ធបង្ហូរទឹកបុរាណ សាកល្បង ជួសជុល និងអភិរក្សជណ្តើរថ្នាក់ទី៥ និងចម្លាក់តោចំនួនមួយ។

ចំណែកឯ ដំណាក់កាល ទី២ (ឆ្នាំ២០២០-២០២១) អាជ្ញាធរជាតិព្រះវិហារ បានអភិរក្ស និងជួសជុលជណ្តើរបុរាណខាងជើង ពីថ្នាក់ទី២ ដល់ទី៤ អភិរក្ស និងជួសជុលស្ពានហាលខាងលិចប្រវែង ៩ ម៉ែត្រ អភិរក្ស និងជួសជុលចម្លាក់តោចំនួន ១ និងគុជសីហ៍ចំនួន ១។

អជ្ញាធរជាតិព្រះវិហារនឹងបន្តអនុវត្តគម្រោងដំណាក់កាលទី៤ រយៈពេលពីរឆ្នាំ (២០២២ ដល់២០២៤) ដេីម្បីជួសជុលជណ្តើរបុរាណខាងជើងប្រាសាទព្រះវិហារ ពីថ្នាក់ទី១១ ដល់១៤​ ក្រោមជំនួយថវិកាពីមូលនិធិឯកអគ្គរដ្ឋទូតសហរដ្ឋអាមេរិក ដើម្បីអភិរក្សសម្បត្តិវប្បធម៌៕