លោក ពូទីន ចុះទៅទីស្នាក់ការកណ្ដាលសម្រាប់ប្រតិបត្តិការយោធាពិសេស​​នៅ អ៊ុយក្រែន

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចុះទៅទីស្នាក់ការកណ្តាលសម្រាប់ “ប្រតិបត្តិការយោធាពិសេសនៅអ៊ុយក្រែន” ខណៈចំណាត់ការ​នេះ​បង្ហាញ​ថា ​លោក​នឹង​បន្តសង្គ្រាម​លុកលុយ​របស់​ក្រុង​មូស្គូ​លើ​ទីក្រុងកៀវ ។

អ្នកនាំពាក្យប្រធានាធិបតីរុស្ស៊ីបានប្រកាសកាលពីពេលថ្មីៗនេះថា លោក ពូទីន បានចុះទៅទីស្នាក់ការកណ្តាលកាលពីថ្ងៃសៅរ៍ ហើយលោកប្រធានាធិបតីបានផ្តល់ការពិភាក្សាយ៉ាងយកចិត្តទុកដាក់ទៅកាន់មេបញ្ជាការយោធា រួមទាំងលោករដ្ឋមន្ត្រីការពារជាតិ Sergei Shoigu និងនាយអគ្គសេនាធិការកងទ័ពលោក Valery Gerasimov ។

លោក ពូទីន បាននិយាយថា លោកចង់ស្តាប់សំណើរបស់ពួកគេស្តីពីសកម្មភាពភ្លាមៗ និងរយៈពេលមធ្យមរបស់កងកម្លាំងរុស្ស៊ី បន្ទាប់ពីការិយាល័យប្រធានាធិបតីបានបដិសេធលទ្ធភាពនៃបទឈប់បាញ់ ក្នុងអំឡុងពេលបុណ្យណូអែល និងបុណ្យចូលឆ្នាំថ្មី ។

ការចុះទៅទីស្នាក់ការកណ្ដាលសម្រាប់ប្រតិបត្តិការយោធាពិសេសរបស់លោក ពូទីន ក៏កើតឡើង ស្របពេលការ​វាយ​ប្រហារ​ដោយ​កាំជ្រួចមីស៊ីលទ្រង់ទ្រាយ​ធំ​របស់​រុស្ស៊ី​ បាន​បំផ្លាញទីតាំង​ថាមពល​នៅ​ក្នុង​រដ្ឋធានី​កៀវ និង​តំបន់​ផ្សេង​ទៀត​នៅ​ទូទាំង​ភាគ​ខាង​កើត និង​ភាគ​ខាង​ត្បូង​អ៊ុយក្រែន​កាល​ពី​ថ្ងៃ​សុក្រ ។

ពាក់ព័ន្ធនឹងបញ្ហានេះដែរ រដ្ឋមន្ត្រីថាមពលអ៊ុយក្រែនលោក Herman Halushchenko បាននិយាយថា យ៉ាងហោចណាស់មានរោងចក្រផលិតថាមពលចំនួន ៩ ត្រូវបានរងផលប៉ះពាល់ ហើយការផ្គត់ផ្គង់ថាមពលបានធ្លាក់ចុះដល់ ៥០ ភាគរយ ។

ដោយឡែកប្រធានាធិបតីអ៊ុយក្រែនលោក Volodymyr Zelensky បាននិយាយផងដែរថា ប្រទេសរុស្ស៊ីនៅតែមានកាំជ្រួចមីស៊ីលគ្រប់គ្រាន់សម្រាប់ការវាយប្រហារទ្រង់ទ្រាយធំជាច្រើនទៀតលើអ៊ុយក្រែន ប៉ុន្តែ​លោក​បាន​បន្ថែម​ថា អ៊ុយក្រែននៅតែ​មាន​ការ​ប្ដេជ្ញា​ចិត្ត និង​ជំនឿ​លើ​ខ្លួន​ឯង​ក្នុង​ការ​វាយ​តបត​វិញផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK