សរុបព្រឹត្តិការណ៍ខ្លះៗ និងរឿងរ៉ាវប្លែកៗក្នុងការប្រកួតបាល់ទាត់ World Cup នៅកាតា

ការប្រកួតបាល់ទាត់ពិភពលោក FIFA World Cup ឆ្នាំ ២០២២ ដែលរៀបចំឡើងនៅប្រទេសកាតា បានចប់សព្វគ្រប់ហើយកាលពីយប់មិញ ដោយជើងឯកបានទៅលើប្រទេសអាហ្សង់ទីន បន្ទាប់ពីយកឈ្នះបារាំងដោយបាល់ប៉េណាល់ទីកាត់សេចក្ដី ក្រោយខកខានអស់រយៈពេល ៣៦ ឆ្នាំ ។

ការប្រកួតដែលចាប់ផ្ដើមដំណើរការតាំងពីថ្ងៃទី២០ ខែវិច្ឆិកា ឆ្នាំ២០២២ មក ក៏មានរឿងប្លែកៗ និងប្រវត្តិសាស្ត្រច្រំដែល ក៏ដូចជារឿងហួសចិត្តជាច្រើនផងដែរ ។

-កាតា កាន់ប្រវត្តិសាស្ត្រអាក្រក់បំផុតក្នុងនាមជាម្ចាស់ផ្ទះ ដោយចាញ់ទាំង ៣ ប្រកួត ។

-អារ៉ាប៊ីសាអូឌីត ឈ្នះប្រកួតបើកឆាកលើ អាហ្សង់ទីន តែបែរជាធ្លាក់នៅក្នុងពូលទៅវិញ ។

-ប៊ែលហ្សិក និងអាល្លឺម៉ង់ សុទ្ធតែធ្លាក់ក្នុងពូល ជាពិសេស អាល្លឺម៉ង់ គឺជាន់ដានចាស់ មិនអាចឆ្លងផុតវគ្គចែកពូលនៅ World Cup ២ លើកចុងក្រោយ (២០១៨ និង​ ២០២២) ។

-មានការបន្ថែមម៉ោងច្រើនៗខុសពី World Cup មុនៗ ។

-គោជល់អេស្ប៉ាញធ្វើបានល្អជាងគេក្នុងវគ្គសន្សុំពិន្ទុតាមពូលជុំទី១ ដោយយកឈ្នះកូស្ដារីការហូតដល់ ៧-០ ។

-មន្ត្រីអាជ្ញាកណ្ដាលកាត់សេចក្ដីលើទីលានក្នុងការប្រកួតរវាងអាល្លឺម៉ង់ និងកូស្ដារីកា គឺសុទ្ធតែជាស្ត្រី ពោលមិនធ្លាប់មានក្នុងប្រវត្តិសាស្ត្រ World Cup ។

-អ៊ុយរូហ្គាយ ស្មើទាំងគ្រាប់បាល់ និងពិន្ទុជាមួយកូរ៉េខាងត្បូង ប៉ុន្តែអ៊ុយរូហ្គាយត្រូវធ្លាក់ក្នុងវគ្គចែកពូល ដោយសារកូរ៉េខាងត្បូងស៊ុតបាន ៤ គ្រាប់ ខណៈអ៊ុយរូហ្គាយស៊ុតបានតែ ២ គ្រាប់ប៉ុណ្ណោះ ។

-កំពូលខ្សែប្រយុទ្ធ Cristiano Ronaldo បានជាប់ឈ្មោះក្នុងជម្រើសកីឡាករ ១១ នាក់ ដែលលេងអន់បំផុតក្នុងវគ្គចែកពូល នៃព្រឹត្តិការណ៍បាល់ទាត់ពិភពលោកឆ្នាំ២០២២ នៅប្រទេសកាតា ។

-ខ្សែការពារបារាំង Jules Kounde ពាក់ខ្សែ ក ចូលលេង ពេលប៉ះជាមួយនឹងប៉ូឡូញនៅវគ្គ ១៦ ក្រុមចុងក្រោយ ដែលផ្ទុយនឹងច្បាប់របស់ FIFA ។

-World Cup នៅកាតា ប៉ុន្តែមិនសូវមានពលរដ្ឋកាតាទៅអ្នកទស្សនានោះទេ បែរជាសម្បូរទៅដោយពលរដ្ឋមកពីអារ៉ាប៊ីសាអូឌីត និងឥណ្ឌាទៅវិញ ។

-ពេញមួយព្រឹត្តិការណ៍ World Cup មានអ្នកស៊ុតបញ្ចូលទីបាន ៣ គ្រាប់ម្នាក់ឯងក្នុងមួយប្រកួត (Hat-Trick) តែម្នាក់ប៉ុណ្ណោះ នោះគឺខ្សែប្រយុទ្ធព័រទុយហ្គាល់ Goncalo Ramos ពេលឈ្នះស្វីស ៦-១ ។

-ជំនួប ហូឡង់ និងអាហ្សង់ទីន វគ្គ ៨ ក្រុមចុងក្រោយ ជាការប្រកួតមានកាតលឿងច្រើនបំផុត ក្នុងប្រវត្តិសាស្រ្ត World Cup ពោលលោកអាជ្ញាកណ្ដាលសញ្ជាតិអេស្ប៉ាញ Antonio Mateu Lahoz បានចាយកាតលឿងរហូតដល់ ១៧ កាត ។

-ការប្រកួតរវាងព័រទុយហ្គាល់ និងម៉ារ៉ុក, មន្ត្រីអាជ្ញាកណ្ដាលលើទីលានសុទ្ធតែជនជាតិអាហ្សង់ទីន ដែលត្រូវបានគេសន្និដ្ឋានថា គាំទ្រ Messi និងស្អប់ Ronaldo ហើយជាលទ្ធផលម៉ារ៉ុក ឈ្នះព័រទុយហ្គាល់ ១-០ ។

-ខ្សែប្រយុទ្ធម៉ារ៉ុក Youssef En-Nesyri ដែលរកគ្រាប់បាល់ឈ្នះព័រទុយហ្គាល់ ជាប់កំណត់ត្រាអន់បំផុត ដោយអាចប៉ះបាល់បានតែ ៣ ដងប៉ុណ្ណោះ ក្នុងការប្រកួតដែលម៉ារ៉ុក ចាញ់បារាំង ២-០ ក្នុងវគ្គពាក់កណ្តាលផ្តាច់ព្រ័ត្រពានរង្វាន់ពិភពលោក ។

-ក្រូអាត ដែលជាប់ចំណាត់ថ្នាក់លេខ ៣ នៅ World Cup ទទួលបានប្រាក់រង្វាន់ ២៧ លានដុល្លារអាមេរិក ខណៈម៉ារ៉ុក លេខ ៤ ទទួលបាន ២៥ លានដុល្លារអាមេរិក ។

-អាហ្សង់ទីនជាន់ដានអេស្ប៉ាញកាលពីឆ្នាំ ២០១០ ចាញ់ប្រកួតបើកឆាក តែបន្តឈ្នះរហូតក្លាយជាជើងឯក ។

-ម្ចាស់ជើងឯកអាហ្សង់ទីនទទួលបានប្រាក់រង្វាន់ ៤២ លានដុល្លារអាមេរិក ខណៈជើងឯករងបារាំងទទួលបានទឹកប្រាក់ ៣០ លានដុល្លារ ។

Messi វ័យ៣៥ឆ្នាំ បំបែកឯតទគ្គកម្មសម្រាប់ការប្រកួត World Cup ដោយក្លាយជាកីឡាករបង្ហាញខ្លួនច្រើនលើកជាងគេបំផុត ពោលគឺរូបគេចូលលេង World Cup​ បានសរុប ២៦ប្រកួត ។

ពានរង្វាន់ស្បែកជើងមាស ៖ Kylian Mbappe (បារាំង)

ពានរង្វាន់បាល់មាស ៖ Lionel Messi (អាហ្សង់ទីន)

ពានរង្វាន់ស្រោមដៃមាស ៖ Emiliano Martinez (អាហ្សង់ទីន)

ពានរង្វាន់កីឡាករវ័យក្មេងរបស់ FIFA ៖ Enzo Fernandez (អាហ្សង់ទីន)

ពានរង្វាន់ FIFA Fair Play ៖ ប្រទេសអង់គ្លេស

ពានរង្វាន់ស្បែកជើងប្រាក់ ៖ Lionel Messi (អាហ្សង់ទីន)

ពានរង្វាន់ស្បែកជើងសំរឹទ្ធ ៖ Olivier Giroud (បារាំង)

ពានរង្វាន់បាល់ប្រាក់ ៖ Kylian Mbappe (បារាំង)

ពានរង្វាន់បាល់សំរឹទ្ធ ៖ Luka Modric (ក្រូអាត)

គួរបញ្ជាក់ថា ការប្រកួតបាល់ទាត់ពិភពលោក FIFA World Cup ឆ្នាំ ២០២៦ នឹងរៀបចំឡើងនៅថ្ងៃទី៨ ខែមិថុនា ដល់ថ្ងៃទី៣ ខែកក្កដា ដោយសហម្ចាស់ផ្ទះអាមេរិក កាណាដា និងម៉ិកស៊ិក ៕

ដោយ ៖ ជីវ័ន្ត

ចុចអាន ៖ លោក ពូទីន អបអរ អាហ្សង់ទីន ឈ្នះជើងឯក World Cup ឆ្នាំ២០២២