លាតត្រដាងអាថ៌កំបាំងពីរូបគំនូរ Mona Lisa ៦ រឿង

រូបគំនូរ Mona Lisa គូរដោយលោក Leonardo da Vinci បានទាក់ទាញចំណាប់អារម្មណ៍ភ្ញៀវទេសចរប្រមាណ ៦លាននាក់ទៅទស្សនានៅសារមន្ទីរ Louvre ជារៀងរាល់ឆ្នាំមិនដែរខាន។ ក្នុងរយៈពេលប៉ុន្មានឆ្នាំចុងក្រោយនេះ អ្នកស្រាវជ្រាវរកឃើញថាមានអត្ថន័យជាច្រើនទៀតកំពុងបង្កប់នៅក្នុងគំនូរ ហើយទាមទារការពិនិត្យនិងពិចារណាជាច្រើនទម្រាំរកបានព័ត៌មានដូចខាងក្រោមនេះ៖

១. ផ្ទៃខាងក្រោយមិនស្មើគ្នា

ប្រសិនបើអ្នកក្រឡេកមើលឲ្យជិតទៅនឹងទិដ្ឋភាពផ្ទៃខាងក្រោយ នោះអ្នកនឹងឃើញថាម្ខាងខ្ពស់ម្ខាងទាប។ ផ្នែកនៅខាងស្តាំក្បាលរបស់នាងហាក់ដូចជាត្រូវលាបពណ៌នៅកម្រិតខ្ពស់ជាងផ្នែកខាងឆ្វេង។ ដូច្នេះនៅពេលអ្នកកម្រើកភ្នែករបស់អ្នកពីស្តាំទៅឆ្វេង អ្នកនឹងសម្គាល់ឃើញការផ្លាស់ប្តូរ។

២. ស្ត្រីដ៏អាថ៌កំបាំង

ដំបូងគេប៉ាន់ស្មានថា Mona Lisa គឺជាស្ត្រីអភិជន អ្នកខ្លះទៀតថារូបនេះជារូបលោក Leonardo da Vinci ជាស្ត្រី ខណៈមានអ្នកជឿថានាងគឺជាគូស្នេហ៍ ២០ឆ្នាំរបស់គាត់។ បច្ចុប្បន្នគេសន្មត់ថា Mona Lisa មានឈ្មោះ Lisa Gherardini del Giocondo ជាឈ្មោះពិត។

៣. ចិញ្ចើមមួយសរសៃ

ដំបូងឡើយគេពិតជាងឿងឆ្ងល់មែនទែនចំពោះស្ត្រីគ្មានចិញ្ចើមរូបនេះ ស្រាប់តែអ្នកជំនាញធ្វើការពង្រីកមើលឲ្យលម្អិតទើបឃើញថាមានចិញ្ចើមមួយសរសៃនៅផ្នែកខាងឆ្វេង។ យ៉ាងណាក្ដី គេនៅតែមិនទាន់ជ្រាបពីហេតុផលដែលលោក Leonardo da Vinci គូសចិញ្ចើមតែមួយសរសៃគត់។

៤. ការងប់ងល់ចំពោះគំនូរ

ជាទូទៅ វិចិត្រករមួយណាក៏មានគំនូរសំណព្វចិត្តដែរ សម្រាប់ លោក Leonardo da Vinci គេអាចនិយាយបានថា Mona Lisa គឺជាគំនូរសំណព្វចិត្តរបស់គាត់ ព្រោះថាគាត់យកគំនូរនេះតាមខ្លួនគ្រប់ពេលអស់រយៈពេលយ៉ាងតិច៤ឆ្នាំ។

៥. តិចនិកដ៏អស្ចារ្យ

នៅពេលមើលកាន់តែជិតនៃគំនូរ អ្នកនឹងឃើញស្បៃមួយដែលមិនមែនជាការងាយសម្រាប់គូរទេ។ យោងតាមអ្នកជំនាញបានឲ្យដឹងថា លោក Leonardo លាបពណ៌ទេសភាពជាមុនសិន បន្ទាប់មកប្រើបច្ចេកទេសពិសេសបន្ថែមស្បៃពីលើ។

៦. គូរមិនទាន់ចប់

អ្នកជំនាញបង្ហាញថាម្រាមដៃឆ្វេងមិនទាន់គូរចប់នៅឡើយទេ តាមពិតទៅអ្នកក៏អាចឃើញពីរបៀបដែលគាត់ដាក់ម្រាមដៃចង្អុលឆ្វេងដែរ តែក្រោយមកគេកែវាទៅជាអ្វីដែលយើងឃើញឥឡូវនេះ។

ក្រៅពីរឿងទាំង ៦ខាងលើនេះហើយ នៅមានរឿងរ៉ាវប្លែកៗដែលអ្នកគួរដឹងរួមមាន៖

_ កាលពីឆ្នាំ ១៩៥៦ មានមនុស្សម្នាក់គប់ដុំថ្មដាក់គំនូរនេះចំកែងដៃ ធ្វើឲ្យមានការកែគំនូរ

_ Da Vinci គូរ Mona Lisa នៅលើក្ដារឈើ poplar 

_ មានភួយគ្រប់ដណ្ដប់ជង្គង់និងពោះរបស់ Mona Lisa នៅក្នុងគំនូរ 

_ យោងតាមការប៉ាន់ស្មាន Mona Lisa ប្រហែលជាទទួលរងអំពើហិង្សាក្នុងគ្រួសារទើបបណ្ដាលឲ្យមានស្លាកស្នាមតូចមួយនៅលើបបូរមាត់របស់នាង៕

ប្រែសម្រួលដោយ៖ វារី

ចុចអាន៖ គំនូរល្បីៗទូទាំងពិភពលោក ៦ ផ្ទាំង ត្រូវគេលួច ដោយសារតែតម្លៃរាប់លាន

ចុចអាន៖ គំនូរ ១០ ផ្ទាំងនេះ មានឈ្មោះល្បីទូទាំងពិភពលោក ឯតម្លៃវិញកប់ក្ដោង