ចូវ សុធារ៉ា ៖ កីឡាការិនីចំបាប់កម្ពុជា ចាញ់ប្រៀបគេលើកំលាំង ប៉ុន្តែបើបច្ចេកទេសមិនលើគ្នានោះទេ

ការប្រកួតកីឡាចំបាប់ជើងឯកអាស៊ីអាគ្នេយ៍ដែលកម្ពុជាធ្វើម្ចាស់ផ្ទះ ទើបតែបញ្ចប់កាលពីពេលថ្មីៗនេះ កម្ពុជាទទួលបានមេដាយសរុបរហូតដល់ទៅ១៩គ្រឿង មាស៣ ប្រាក់៣ និង សំរឹទ្ធិ១៣គ្រឿង ។ប៉ុន្តែក្នុងចំណោមមេដាយមាសទាំង៣នោះ កីឡាការិនីមិនទាន់មានអ្នកណាដណ្តើមយកបាននោះទេ ដោយឈ្នះត្រឹមមេដាយប្រាក់ និង សំរឹទ្ធិតែប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនិងចំណុចនេះ គ្រូបង្វឹកជម្រើសជាតិនារី  ចូវ សុធារ៉ា បានលើកឡើងថា« សម្រាប់ការប្រកួតចុងក្រោយនៅ   កម្ពុជានេះ សង្កេតឃើញថា មានភាពខុសប្លែកគ្នាជាងលើកមុន ដោយមានការកើនឡើងកម្រិតបច្ចេកទេស១កម្រិតទៀត ប៉ុន្តែនៅមានកីឡាការិនី មួយចំនួនមិនទាន់ឈានទៅរកកម្រិតល្អនោះដែរ។ អតីតម្ចាស់មេដាយមាសស៊ីហ្គេមរូបនេះ អៈអាងថា និងខិតខំបង្កើនការហ្វឹកហាត់នៅក្នុងស្រុក និងបញ្ចូនពួកគាត់ទៅហ្វឹកហាត់នៅប្រទេស ក្រៅបន្ថែមទៀត»។  

« បើនិយាយពីចំណុចខ្សោយ កម្ពុជាចាញ់ប្រៀបគេបន្តិច ត្រង់មិនសូវមានថាមពល ចំពោះបច្ចេកទេសមិនសូវលើ គ្នាប៉ុន្មាននោះទេ ប៉ុន្តែយើងចាញ់គេត្រង់កំលាំងនិងតែម្តង»។ នេះជាការលើកឡើងបន្ថែមរបស់ ចូវ សុធារ៉ា។

អតីតម្ចាស់មេដាយមាសស៊ីហ្គេមរូបនេះ អៈអាងថា « ការហ្វឹកហាត់មានដូចៗគ្នា តែបើនិយាយពីការប្រកួត និងការហ្វឹកហាត់វាខុសគ្នា គឺពាក់ព័ន្ធទៅនិងអារម្មណ៍ ចិត្តសាស្រ្ត ប្រសិនយើងមិនមានចំណុច២នេះខ្ពស់ទេ ការប្រកួតយើងធ្វើមិនបានល្អនោះទេ។ ពេលដែលការប្រកួតជិតមកដល់ អត្តលិកនីមួយគឺគេងមិនលក់ ចឹងហើយទើបធ្វើឲ្យបាក់កំលាំងមួយចំនួន ទើបពួកគេធ្វើមិនបានល្អពេលប្រកួត»។

ឆ្លងកាត់ការប្រកួតលើកនេះ អ្នកនាង ចូវសុធារ៉ា អៈអាងថា  « ការរៀបចំធ្វើម្ចាស់ផ្ទះអាស៊ីអាគ្នេយ៍នេះ គឺល្អ ដោយបានស្ទង់សមត្ថភាព ចឹងដល់ពេលស៊ីហ្គេមមកដល់និងដឹងថា ​អាចទៅដល់គេឬយ៉ាងម៉េច ឬក៍ដឹងថាខ្វះខាតអ្វីខ្លះ យើងកែរប្រែរៀបចំអោយហើយស្រេចតែម្តង។ ទម្រាំដល់ពេលស៊ីហ្គេម កីឡាការិនីកម្ពុជា និងអាចដណ្តើមយក មេដាយបាន ព្រោះកីឡាការិនីកម្ពុជា​ និង កីឡាការិនីប្រទេសផ្សេង ទាំងកំលាំងនិង បច្ចេកទេសគឺប្រហាក់ប្រហែលគ្នា ប៉ុន្តែដូចឡែកកីឡាករវិញ រាងនៅឆ្ងាយបន្តិច»។

សម្រាប់ការប្រកួតកីឡាចំបាប់ជើងឯកអាស៊ីអាគ្នេយ៍ដែលកម្ពុជាធ្វើជាម្ចាស់ផ្ទះនេះ គឺមានកីឡាការិនីចូលរួមចំនួន៨រូប ដោយប្រកួតលើវិញ្ញាសា សេរីទាំងអស់ លើប្រភេទទម្ងន់ ៥០គីឡូ, ៥៣ , ៥៥ , ៥៧ , ៥៩, ៦២, ៦៥,៧២ និង ៧៦ គឺជាប្រភេទម្ងន់ដែលកម្ពុជាធ្វើម្ចាស់ផ្ទះស៊ីហ្គេមតែម្តង៕