អ្នកគាំទ្រឥណ្ឌូណេស៊ី បង្កការភ័យខ្លាចដល់កីឡាករថៃ មុនការប្រកួតមកដល់

អ្នកគាំទ្របាល់ទាត់ឥណ្ឌូណេស៊ី បានបង្ករការភ័យខ្លាចដល់កីឡាករនៃក្រុមជម្រើសជាតិថៃ តាំងពីមកដល់កីឡដ្ឋាន ខណៈបង្អួចរថយន្ដក្រុងត្រូវបានវាយកម្ទេច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍បានកើតឡើងនៅមុនការប្រកួតរវាងក្រុមជម្រើសជាតិឥណ្ឌូនេស៊ី ជាមួយក្រុមជម្រើសជាតិថៃ សម្រាប់ជំនួប ទី៤ ប្រចាំពូល A ពានរង្វាន់ជើងឯកអាស៊ាន (AFF Mitshubishi Eletric Cup 2022) ដែលធ្វើឡើងនៅទឹកដីនៃប្រទេសឥណ្ឌូនេស៊ី ជាទីដែលត្រូវបានគេចាត់ទុកថា ប្រទេសមានអ្នកគាំទ្រងុបងល់បាល់ទាត់ជាទីបំផុត។

ពេលក្រុមជម្រើសជាតិថៃ មកដល់កីឡដ្ឋានតាមរយៈរថយន្ដក្រុង ពេលដែលទៅដល់មាត់ទ្វារចូល ស្រាប់តែមានអ្នកគាំទ្របាល់ទាត់មួយក្រុមបានលើកម្រាមដៃកណ្តាលដល់កីឡាករបាល់ទាត់ថៃ ហើយខ្លះបានលោតមកវាយកញ្ចក់រថយន្តរហូតដល់បែក។ ទោះបីមានឡានប៉ូលិសនៅខាងមុខក៏ប៉ូលីសមិនបានអន្តរាគមន៍ទាន់ពេលដែរ ដែលគេមិនច្បាស់ថាកីឡាករ ថៃមានគ្រោះថ្នាក់ ឬអត់។

យ៉ាងណាមិញ ក្រុមទាំងពីរក៏ប្រកួតគ្នាជាធម្មតា ដែលបានបញ្ចប់ទៅដោយលទ្ធផលស្មើគ្នា ១-១។ ហើយក្រោយចប់ការប្រកួតដែលឥណ្ឌូនេស៊ី ស្មើ ១-១ នេះ ស្រាប់តែអ្នករៀបចំការប្រកួតបានផ្លាស់ប្តូរប្រព័ន្ធសុវត្ថិភាពសម្រាប់ក្រុមជម្រើសជាតិថៃ ដោយផ្លាស់ប្តូររថយន្ដក្រុងឱ្យធំជាងមុន។ មានរថយន្តប៉ូលិសច្រើនទៀតបើកបរឆ្វេង ស្ដាំ មុខក្រោយ រួមទាំងម៉ូតូជាមួយមន្ត្រីប៉ូលិស និងកាំភ្លើង។ ដើម្បីការពារអ្នកគាំទ្រមិនឱ្យចូលទៅក្នុងរថយន្ត និងកីឡាករថៃ។

ចំណែកបរិយាកាសវិញចាត់ទុកថាល្អជាងពេលមកដល់កីឡដ្ឋាន។ ដោយសារតែអ្នកគាំទ្របាល់ទាត់ត្រឡប់មកវិញជាបណ្តើរៗតែមួយផ្នែកប៉ុណ្ណោះដែលនៅមានករណីខ្លះនៅតែលើកម្រាមកណ្តាលដូចមុន ប៉ុន្តែមានអ្នកចូលចិត្តកីឡាករថៃជាច្រើន។ ទីបំផុតកីឡាករទាំងអស់បានមកដល់សណ្ឋាគារដោយសុវត្ថិភាព ហើយគ្រោងនឹងត្រឡប់ទៅប្រទេសថៃវិញនៅថ្ងៃ៣០ ធ្នូ ២០២២៕

ប្រភព៖ Ball Thai Stand

អត្ថបទ៖ មន្នីរ័ត្ន