ឆ្នាំនេះ អាមេរិក​ នឹងសម្រេចថា ត្រូវលក់យន្តហោះចម្បាំងឲ្យ ថៃ ដែរឬក៏អត់

កងទ័ពអាកាសថៃ នឹងដឹងច្បាស់នៅពាក់កណ្តាលឆ្នាំនេះថាតើ ទីក្រុងវ៉ាស៊ីនតោននឹងយល់ព្រមលក់យន្តហោះចម្បាំងធុន F-35A Lightning II ទៅឲ្យប្រទេសថៃដែរឬក៏អត់។ នេះបើតាមការបញ្ជាក់ពីអគ្គមេបញ្ជាការ Alongkorn Wannarot។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Alongkorn និយាយថា កងទ័ពអាកាសកំពុងចរចា អំពីការរៀបចំដើម្បីទិញយន្តហោះ ប៉ុន្តែការលក់មិនទាន់ត្រូវបានអនុម័តដោយរដ្ឋាភិបាលសហរដ្ឋអាមេរិកនៅឡើយទេ។ មន្ត្រីអាមេរិក កំពុងត្រួតពិនិត្យតំបន់ដែលកងយន្តហោះ F-35A នឹងត្រូវឈរជើង។

លោកបន្តថា “ប្រសិនបើអ្វីៗដំណើរការទៅតាមផែនការ ខ្ញុំរំពឹងថា កិច្ចព្រមព្រៀងនេះនឹងត្រូវសម្រេចនៅពាក់កណ្តាលឆ្នាំនេះ។ លទ្ធកម្មគឺជាបញ្ហាផ្ទៃក្នុងសម្រាប់កងទ័ពអាកាស ប៉ុន្តែរំពឹងថា ក្រសួងការបរទេសនឹងជួយក្នុងការចរចាជាមួយរដ្ឋាភិបាលសហរដ្ឋអាមេរិក”។

លើសពីនេះ កងកម្លាំងអាកាសក៏កំពុងពិចារណាលើការទិញប្រព័ន្ធរ៉ាដាថ្មីមួយ ដើម្បីជំនួសប្រព័ន្ធរ៉ាដា Erieye ដែលមានអាយុ១០ឆ្នាំផងដែរ។ Erieye គឺជាប្រព័ន្ធប្រកាសអាសន្ន និងគ្រប់គ្រងលើអាកាស ដែលបង្កើតឡើងដោយប្រព័ន្ធការពារអេឡិចត្រូនិក Saab របស់ប្រទេសស៊ុយអែត។

យន្តហោះទាំងនេះ គឺជាផ្នែកមួយនៃស៊េរីយន្តហោះ F-35 Lightning II ម៉ាស៊ីនមួយរបស់ក្រុមហ៊ុន Lockheed Martin។ ទោះបីជាយ៉ាងណាក៏ដោយ ទីក្រុងវ៉ាស៊ីនតោន ​យល់ព្រម​លក់យន្តហោះប្រភេទនេះ ឲ្យតែ​សម្ព័ន្ធមិត្ត​ជិតស្និទ្ធ​ប៉ុណ្ណោះ​។ នៅក្នុងតំបន់អាស៊ីប៉ាស៊ីហ្វិក មានតែអូស្ត្រាលី ជប៉ុន កូរ៉េខាងត្បូង និងសិង្ហបុរីទេ ដែលអាចទិញយន្តហោះ F-35A នេះបាន៕

ប្រែសម្រួល៖ Vann Vann

ប្រភព៖ Nation

ចុចអាន៖ លោកខាងលិច សម្រេចមិនផ្តល់ យន្តហោះចម្បាំង និងរថក្រោះ ទៅឲ្យ អ៊ុយក្រែន