មកស្គាល់សំបុកសត្វអាយុជាង ២០០០ ឆ្នាំ នៅ ហ្គ្រីនឡែន

សំបុកស្ទាំង Gyrfalcons ដែលយើងលើកយកមកបង្ហាញនេះជា សំបុកសត្វមានវ័យចំណាស់ជាងគេបំផុតមិនធ្លាប់រកឃើញពីមុនមក ។ អ្នកជំនាញបក្សីកំពុងព្រួយបារម្ភពីបម្រែបម្រួលអាកាសធាតុ ដែលអាចបង្ខំសត្វស្ទាំងឲ្យចាកចេញពីសំបុកបុរាណរបស់ពួកគេ ។ 

សត្វស្ទាំងប្រភេទនេះរស់នៅជុំវិញតំបន់អាក់ទិក ស្លាបរបស់ស្ទាំងនៅតំបន់ហ្គ្រីនឡែនមានពណ៌សខុសពីស្លាបស្ទាំងនៅខេត្ត Labrador ប្រទេសកាណាដាដែលមានពណ៌ខ្មៅ ។ ជាទូទៅស្ទាំងមិនបង្កើតសំបុកចេញពីមែកឈើទេ ប៉ុន្តែវាកាយក្រហូងដីដើម្បីពង ។ ថ្ងៃមួយអ្នកជំនាញបក្សីលោក Kurt Burnham នៃសាកលវិទ្យាល័យ Oxford ចក្រភពអង់គ្លេស និងសហការីបានសម្រេចចិត្តកំណត់កាលបរិច្ឆេទកាបូន និងកំទេចកំទីផ្សេងៗដែលសត្វស្លាបបន្សល់ទុកនៅកន្លែងសំបុកវា លោកភ្ញាក់ផ្អើលខ្លាំងមែនទែនចំពោះលទ្ធផល ។ លទ្ធផលវិនិច្ឆ័យបានបង្ហាញថា សំបុកមួយក្នុងក្រុង Kangerlussuaq នៅកណ្តាលភាគខាងលិចហ្គ្រីនឡែន មានអាយុចន្លោះពី ២,៣៦០ឆ្នាំ ដល់ ២,៧៤០ឆ្នាំ ចំណែកឯសំបុកបីទៀតក្បែរនោះមានអាយុកាលជាង ១០០០ឆ្នាំ និងសំបុកក្មេងជាងគេក៏មានអាយុប្រហែល ៥២០ឆ្នាំ ទៅ ៦៥០ឆ្នាំ ដែរ ។ ទោះបីជាយ៉ាងណាក៏ដោយសំបុកបុរាណទាំងនេះ នៅតែមានស្ទាំងបន្តរស់នៅ និងប្រើប្រាស់ជាប្រចាំ ។ 

ក្រៅពីនេះក្រុមរបស់លោក Kurt បានរកឃើញតម្រុយដ៏គួរឱ្យចាប់អារម្មណ៍អំពីប្រវត្តិបក្សីផងដែរ ។ នៅក្នុងសំបុកទាំង ១៣ ដែលគេយកសំណាក អ្នកស្រាវជ្រាវរកឃើញរោមបីដែលជាកម្មសិទ្ធិរបស់បក្សីមុនៗគឺ សត្វបក្សីដែលក្មេងបំផុតមានអាយុកាល ៦០ឆ្នាំមុន និងសត្វបក្សីចាស់បំផុតមានអាយុកាលតាំងពី ៦៧០ឆ្នាំមុនឯណោះ ៕

ប្រែសម្រួលដោយ ៖ វារី

ចុចអាន ៖ ទស្សនារូបភាពតារាបង្ហាញម៉ូដ ជាសត្វបក្សី