ប្រយ័ត្ន! WHO ព្រមានថា ថ្នាំសុីរ៉ូប៍ក្អក គ្រោះថ្នាក់ដែលបណ្តាលឲ្យកុមារស្លាប់ ក៏អាចមានលក់នៅកម្ពុជាដែរ (មានវីដេអូ)

អង្គការសុខភាពពិភពលោក (WHO) បានអំពាវនាវឲ្យធ្វើសកម្មភាពរួមគ្នាជាបន្ទាន់ ដើម្បីការពារកុមារ បន្ទាប់ពីមានកុមារយ៉ាងច្រើនបានស្លាប់ ក្រោយផឹកថ្នាំស៊ីរ៉ូប៍ក្អក កាលពីឆ្នាំមុន។

WHO បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារទី២៤ខែមករាថា នៅឆ្នាំ២០២២ កុមារជាង៣០០នាក់ ដែលភាគច្រើនមានអាយុក្រោម៥ឆ្នាំ នៅក្នុងប្រទេសហ្គាំប៊ី ឥណ្ឌូណេស៊ី និងអ៊ូសបេគីស្ថាន បានស្លាប់ដោយសាររបួសតម្រងនោមស្រួចស្រាវ ពាក់ព័ន្ធជាមួយនឹងថ្នាំស៊ីរ៉ូប៍ក្អកដែលមានជាតិពុល។

ក្នុងចំណោមថ្នាំស៊ីរ៉ូប៍ដែល WHO ព្រមានគឺជាថ្នាំរបស់ក្រុមហ៊ុនឥណ្ឌា Maiden និង Marion Biotech និងថ្នាំរបស់ក្រុមហ៊ុនឥណ្ឌូណេស៊ី PT Yarindo Farmatama, PT Universal Pharmaceutical, PT Konimex និង PT AFI Pharma។

ក្នុងចំណោមនោះមានថ្នាំស៊ីរ៉ូប៍៤ប្រភេទដែលគេបញ្ជាក់គឺ មានឈ្មោះ Promethazine Oral Solution, Kofexmalin Baby Cough Syrup, Makoff Baby Cough Syrup និង Magrip N Cold Syrup។

ថ្នាំទាំងនេះមានផ្ទុកសារធាតុ diethylene glycol និង ethylene glycol ក្នុងកម្រិតខ្ពស់។

WHO និយាយថា “​សារធាតុ​កខ្វក់​ទាំងនេះ​ ​គឺជាជាតិ​គីមី​ពុល​ដែល​ត្រូវ​បាន​ប្រើប្រាស់​ជា​សារធាតុ​រំលាយ​ ​និង​ភ្នាក់ងារ​បង្កក​ ដែល​អាច​បណ្តាលឲ្យ​ស្លាប់បានសូម្បីតែ​ក្នុង​បរិមាណ​តិចតួច​ក៏ដោយ​ ​ហើយ​មិនគួរ​ត្រូវ​បានដាក់ចូល​ក្នុង​ឱសថ​ឡើយ”។

ក្រៅពីប្រទេសខាងលើ WHO បានប្រាប់រ៉យទ័ថា ប្រទេសហ្វីលីពីន ទីម័រខាងកើត សេណេហ្គាល់ និងកម្ពុជា ក៏អាចនឹងរងផលប៉ះពាល់ផងដែរ ដោយសារថ្នាំប្រភេទនេះ អាចមានលក់កន្លែងទាំងនោះ។ WHO បានអំពាវនាវឲ្យមានសកម្មភាពនៅទូទាំងរដ្ឋជាសមាជិកទាំង១៩៤របស់ខ្លួន ដើម្បីការពារការស្លាប់បន្ថែមទៀត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Reuters

ចុចអាន៖ ថៃ កំពុងប្រយ័ត្ន ថ្នាំទឹកសេរ៉ូ ៤ប្រភេទ ដែលសម្លាប់កុមារជាង ១០០នាក់