ប្រជាពលរដ្ឋដុតសំរាមឆេះរាលដាលក្បែរផ្ទះ​អ្នកភូមិរត់ជាន់ជើងគ្នាចេញពន្លត់

តាមប្រភពពីលោក ជូ ចាន់នី ជំនួយការសាលាសង្កាត់ច្បារអំពៅទី២ បានឲ្យដឹងថា នៅវេលាម៉ោង ១០ ព្រឹកថ្ងៃទី ៧ ខែមីនានេះមានអគ្គិភ័យមួយកើតឡើងនៅដីឡូត៍ទំនេមួយក្នុងភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញបង្កឲ្យប្រជាពលរដ្ឋនាំគ្នាភ័យស្លន់ស្លោព្រោះខ្យល់បោកបក់ខ្លាំងអាចឆេះរាលដាលដល់លំនៅដ្ឋានក្បែកន្លែងកើតហេតុ។

លោក ជូ ចាន់នី បានបន្តថា ពេលឃើញអណ្តាតភ្លើងឡើងខ្លាំងបងប្អូនប្រជាពលរដ្ឋរួមទាំងអាជ្ញាធរបាននាំគ្នាចេញទៅ​យក​​ទឹកជួយពន្លត់ហើយខ្លះទៀតតទុយោទឹកបាញ់ទៅលើកន្លែងដែលឆេះខ្លះទៀតបាញ់លើដំបូលផ្ទះព្រោះខ្លាចផ្កាភ្លើងធ្លាក់លើបង្កើតទៅជាអគ្គិភ័យបំផ្លាញលំនៅដ្ឋានដែលសង់ជាប់គ្នាៗនោះ។

លោក ជូ ចាន់នី បានបញ្ជាក់ថា ប្រមាណជាជិតកន្លះម៉ោងភ្លើងរលត់ទៅវិញហើយមូលហេតុដែលឆេះនេះដោយសារប្រជាពលរដ្ឋដុតសំរាម។

ខណៈនោះលោក យុិន វុធ ចៅសង្កាត់ច្បារអំពៅទី២បានណែនាំដល់បងប្អូនប្រជាពលរដ្ឋបញ្ឈប់ការដុតសំរាមព្រោះភូមិដើមស្លែងក្បែព្រៃត្រែងងាយ និងឆ្លងរាលដាលអាចឆេះដល់ផ្ទះប្រជាពលរដ្ឋទៀតផង។ ដូច្នេះគួរទុកដាក់សំរាមឲ្យបានត្រឹមត្រូវដើម្បីឲ្យកម្មករប្រមូលសំរាមមកដឹកយកចេញ៕

អត្ថបទ៖ នរា