ថៃ ដាក់គុក បុរសលក់ប្រតិទិន ដែលមានរូបសត្វទាពណ៌លឿង

ក្រុមជំនួយផ្នែកច្បាប់បាននិយាយថា បុរសជនជាតិថៃម្នាក់ កាលពីថ្ងៃអង្គារ ទី៧មីនា ត្រូវបានកាត់ទោសឲ្យជាប់ពន្ធនាគាររយៈពេលពីរឆ្នាំ ដោយសារលក់ប្រតិទិនដែលមានរូបថ្លុកកំប្លែងអំពីសត្វទាពណ៌លឿង ដែលតុលាការចាត់ទុកថាជាការចំអកដល់ព្រះមហាក្សត្រថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមមេធាវីថៃទទួលបន្ទុកសិទ្ធិមនុស្សនិយាយថា តុលាការព្រហ្មទណ្ឌក្រុងបាងកកបានសម្រេចថា ប្រតិទិនឆ្នាំ២០២១ គឺមានរូបភាពសត្វទាពណ៌លឿង ដែលមើលទៅហាក់ដូចជា និងចំអកដល់ព្រះមហាក្សត្រថៃ Maha Vajiralongkorn ធ្វើឲ្យខូចកិត្តិនាមរបស់ព្រះអង្គ។

ចុងចោទ ​ត្រូវ​បាន​ចោទប្រកាន់​ក្រោម​ច្បាប់​ប្រមាថ​ព្រះមហាក្សត្រ​របស់​ប្រទេស​ថៃ ដែលច្បាប់នេះនឹង​ដាក់​ពន្ធនាគារ​ពី ៣ ទៅ ១៥ ឆ្នាំ​ចំពោះ​ជន​ណា​ដែល​បង្ខូច​កិត្តិនាម ប្រមាថ ឬ​គំរាមកំហែង​ព្រះមហាក្សត្រ ព្រះមហាក្សត្រីយានី រាជទាយាទ ឬ​អ្នក​រាជានុសិទ្ធិ។

ទោះបីជាយ៉ាងណាក៏ដោយ ក្រុមជំនួយផ្នែកច្បាប់និយាយថា ជនជាប់ចោទអាយុ ២៦ឆ្នាំ ដែលគេស្គាល់ឈ្មោះហៅក្រៅថា Ton Mai ត្រូវតុលាការកាត់បន្ថយទោសមកត្រឹមជាប់ពន្ធនាគារ២ឆ្នាំ ដោយសារតែគាត់ព្រមសហការជាមួយតុលាការ។

តុលាការ​ប្រកាស​ថា រូបភាព​ចំនួន​ប្រាំមួយ​ក្នុង​ប្រតិទិនដែលគាត់លក់ គឺ​ត្រូវ​បានរចនា​ឡើង​ដើម្បី​ចំអកដល់​ព្រះមហាក្សត្រ។

ទាជ័រពណ៌​លឿង គឺ​ជា​និមិត្តរូបមួយ ​នៃ​ចលនា​តវ៉ា​គាំទ្រ​លទ្ធិប្រជាធិបតេយ្យ​របស់​ប្រទេស​ថៃ។

គួរបញ្ជាក់ថា មនុស្សយ៉ាងតិច២៣៣នាក់ ត្រូវបានចោទប្រកាន់ពីបទប្រមាថព្រះមហាក្សត្រ ចាប់តាំងពីខែវិច្ឆិកាឆ្នាំ២០២១មក។ នេះបើតាមការអះអាងពីមេធាវីថៃសម្រាប់សិទ្ធិមនុស្ស៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក អាភិសិទ្ធ ថា ចំណុចដែលធ្វើឱ្យ លោក ប្រាយុទ្ធ ទៅមុខបន្តបាន ជាឱកាសខ្ពស់ក្នុងការកើតមាន វិបត្តិ ក្នុង ប្រទេស