លោក ពូទីន ពិនិត្យយ៉ាងល្អិតល្អន់លើសំណើ ១២ ចំណុចរបស់ ចិន ស្ដីពីជម្លោះនៅ អ៊ុយក្រែន

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានលើកឡើងថា លោកបានពិនិត្យយ៉ាងល្អិតល្អន់លើសំណើចំនួន ១២ ចំណុចរបស់ចិនស្តីពីការដោះស្រាយវិបត្តិនៅអ៊ុយក្រែន បន្ទាប់ពីចិនបានបញ្ចេញសំណើរមួយនេះកាលពីខែមុន ។

ការលើកឡើងបែបនេះរបស់លោក ពូទីន បានកើតឡើងនៅដើមដំបូងនៃកិច្ចចរចារវាងលោក និងប្រធានាធិបតីចិន ស៊ី ជីនពីង ក្នុងដំណើរបំពេញទស្សនកិច្ចផ្លូវរដ្ឋរយៈពេល ៣ ថ្ងៃនៅក្នុងទីក្រុងមូស្គូ ហើយវាក៏ជាដំណើរទស្សនកិច្ចលើកដំបូងរបស់លោក ស៊ី ផងដែរ ចាប់តាំងពីរុស្ស៊ីបានចាប់ផ្ដើមប្រតិបត្តិការសឹកនៅអ៊ុយក្រែនកាលពីខែកុម្ភៈ ឆ្នាំ ២០២២ ។

ក្នុងសំណើទាំង ១២ ចំណុចដែលចិនបានដាក់ចេញ ពាក់ព័ន្ធនឹងវិបត្តិនៅអ៊ុយក្រែនកាលពីខែកុម្ភៈនោះ ក៏អំពាវនាវឲ្យរដ្ឋាភិបាលទីក្រុងមូស្គូ និងទីក្រុងកៀវស្វែងរកកិច្ចសន្ទនា និងបទឈប់បាញ់ផងដែរ ។

នៅក្នុងកិច្ចប្រជុំនោះ លោក ស៊ី ក៏បានលើកឡើងដែរថា “ប្រទេសនីមួយៗអាចសម្រេចបាននូវគោលដៅរបស់ខ្លួន គឺតាមរយៈកិច្ចសហប្រតិបត្តិការទ្វេភាគី ហើយចិន និងរុស្ស៊ី គឺជាអ្នកជិតខាងគ្នាដ៏ធំបំផុត ហើយក៏ជាដៃគូយុទ្ធសាស្ត្រដ៏ទូលំទូលាយផងដែរ” ។

គួរបញ្ជាក់ថា ពិភពលោកកំពុងតាមដានយ៉ាងដិតដល់ក្នុងជំនួបរវាងលោក ស៊ី និងលោក ពូទីន ជាពិសេសគឺផ្ដោតលើរបៀបដែលមេដឹកនាំទាំងពីរ នឹងដោះស្រាយវិបត្តិនៅអ៊ុយក្រែន ដែលរហូតមកដល់ពេលនេះបានអូសបន្លាយពេលជាង ១ ឆ្នាំមកហើយ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកដឹងម្ហូបពិសេសៗ នៃអាហារពេលល្ងាច ដែលលោក ពូទីន និងលោក ស៊ី ទទួលទានជាមួយគ្នា