នាវាចម្បាំងកងទ័ពជើងទឹកបារាំង ១គ្រឿង ចូលចតនៅក្រុងព្រះសីហនុ ក្នុងដំណើរទស្សនកិច្ច ៥ថ្ងៃ

នាវាចម្បាំងកងទ័ពជើងទឹកប្រទេសបារាំង ១គ្រឿង បានចូលចតដោយសុវត្ថិភាព នៅកំពង់ផែស្វយ័តក្រុងព្រះសីហនុ នៅវេលាម៉ោង ៩ព្រឹកថ្ងៃទី ២៤ ខែមីនា ឆ្នាំ ២០២៣នេះ ដោយការចូលសំចតនេះ គឺដើម្បីរឹតចំណងមិត្តភាព និងទស្សនកិច្ចជាផ្លូវការនៅកម្ពុជា ផងដែរ។

នៅក្នុងពិធីទទួលបដិសណ្ឋារកិច្ចស្វាគមន៍ នៃការចូលចតនាវា​កងទ័ពជើងទឹកបារាំង ១គ្រឿង នៅលើកំពង់​ផែ​ស្វយ័ត​ក្រុងព្រះសីហនុ កាលពីព្រឹកថ្ងៃសុក្រនេះ មានវត្តមានមន្ត្រីយោធាកងទ័ពជើងទឹកមូលដ្ឋានសមុទ្ររាម និងលោកឯកអគ្គរដ្ឋទូតបារាំងប្រចាំកម្ពុជា។ មន្ត្រីយោធាកងទ័ពជើងទឹកកម្ពុជា បាននិយាយថា នាវាចម្បាំងកងទ័ពជើងទឹកបារាំងនេះ នឹងចូលចតរយៈពេល ៥ថ្ងៃ ចាប់ពីថ្ងៃទី ២៤ ដល់ថ្ងៃទី ២៨ ខែមីនា ឆ្នាំ ២០២៣។

សូមជម្រាបថា នាវា​នេះមានឈ្មោះ PRAIRIAL-(F-៧៣១) មានបណ្ដោយ ៩៤ម៉ែត្រ ទទឹង ១៤ម៉ែត្រ និងមានជម្រៅ​ទឹក ៤.៣ម៉ែត្រ។ នាវានេះ មានទំងន់​ផ្ទុក ២៩៥០តោន មាន​ចំនួន​មនុស្ស ១០១នាក់​ ដែលដឹកនាំដោយមេបញ្ជាការនាវា លោកវរនាវីឯក​ Francois Maignan៕

អត្ថបទ៖ ស៊ុយ ចាន់ធា