រដ្ឋបាលខេត្តបាត់ដំបងអំពាវនាឱ្យពលរដ្ឋយកចិត្តទុកដាក់លើសំរាមក្នុងឱកាសចូលឆ្នាំខ្មែរ

ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ រដ្ឋបាលខេត្តបាត់ដំបងរៀបចំព្រឹត្តិការណ៍សង្ក្រាន្តលេងកម្សាន្តជាច្រើន ក្នុងនោះ រដ្ឋបាលខេត្តបាត់ដំបងនៅថ្ងៃទី ១២ ខែមេសា ឆ្នាំ ២០២៣នេះ ក៏បានអំពាវនាវឱ្យភ្ញៀវជាតិ និងអន្តរជាតិយកចិត្តទុកដាក់លើការចោលសំរាមឱ្យបានត្រឹមត្រូវផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខេត្តបាត់ដំបងបានរៀបចំព្រឹត្តិការណ៍សង្ក្រាន្តចំនួន ៥ ថ្ងៃ ចាប់ពីថ្ងៃទី ១២ ដល់ ១៦ ខែមេសា ឆ្នាំ២០២៣ នៅបរិវេណវិទ្យាល័យនេតយ៉ង់ និងរូបសំណាកលោកតាដំបងក្រញ៉ូង ក្រុងបាត់ដំបង។ ព្រឹត្តិការណ៍សង្ក្រាន្តនេះ មានជាការរៀបចំកម្មវិធីសប្បាយៗជាច្រើន សម្រាប់ពីធីបុណ្យជាតិមួយនេះ។

រូបភាព៖ រដ្ឋបាលខេត្តបាត់ដំបង

រដ្ឋបាលខេត្តបាត់ដំបងក៏បានអំពាវនាវឱ្យមានការចូលរួមលេងកម្សាន្តឱ្យបានច្រើនកុះករពីសំណាក់ភ្ញៀវជាតិ និងអន្តរជាតិ។ ជាពិសេស កុំភ្លេចចូលរួមថែរក្សាបរិស្ថាន ដោយយកចិត្តទុកដាក់ខ្ពស់ក្នុងការទុកដាក់សំរាមឱ្យមានរបៀបរៀបរយ ឬ ចោលសំរាមនៅតាមធុង និងថង់ដែលក្រុមការងាររៀបចំសង្ក្រាន្តបានដាក់នៅគ្រប់ទីកន្លែង។ ធ្វើបែបនេះដើម្បីជួយថែរក្សាបរិស្ថាន និងគ្រប់គ្របសំរាមបានល្អ ព្រមទាំងផ្តល់ភាពងាយស្រួលដល់ពលរដ្ឋក្នុងការទុកដាក់សំរាម និងមានការយោគយល់អាធ្យាស្រ័យគ្នាទៅវិញទៅមក។

រដ្ខបាលខេត្តបាត់ដំបងបានបញ្ចាក់ថា ក្នុងរាត្រីថ្ងៃទី១ នៃការចាប់ផ្តើមព្រឹត្តិការណ៍សង្ក្រាន្តនេះឃើញថាភ្ញៀវជាតិ និងអន្តរជាតិចូលរួមលេងកំសាន្តច្រើនកុះករ។ រដ្ឋបាលខេត្តក៏សំណូមពរឱ្យប្រជាពលរដ្ឋចូលរួមលេងកម្សាន្តតឱ្យបានច្រើនបន្ថែមទៀតក្នុងឱកាសបុណ្យចូលឆ្នាំខ្មែរនេះ៕