ជនជាតិកេនយ៉ា ជាង២០០នាក់ បង្អត់អាហារដល់ស្លាប់ ព្រោះជឿគេថា នឹងបានឡើងឋានសួគ៌ មុនពិភពលោករលាយ

យោងតាមមន្ត្រីរដ្ឋាភិបាលប្រចាំតំបន់, ក្រុមស្វែងរកអ្នកជឿងប់លើសាសនា នៅក្នុងព្រៃ Shakahola នៃប្រទេសកេនយ៉ា បានរកឃើញសាកសពមនុស្សចំនួន២២ទៀតកាលពីថ្ងៃសៅរ៍ទី១៣ខែឧសភា ដោយការរកឃើញនេះ នាំឲ្យចំនួនមនុស្សស្លាប់ពីសោកនាដកម្មដ៏អាក្រក់បំផុតមួយរបស់ប្រទេស កើនដល់២០១នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Rhodah Onyancha ស្នងការប្រចាំតំបន់បានប្រាប់អ្នកកាសែតនៅក្នុងព្រៃ Shakahola ភាគនិរតីប្រទេសកេនយ៉ាថា “ក្រុមធ្វើកោសល្យវិច្ច័យរបស់យើង អាចរកឃើញសាកសពមនុស្សចំនួន២២នាក់នៅថ្ងៃនេះ ប៉ុន្តែយើងមិនបានរាយការណ៍ពីការជួយសង្គ្រោះណាមួយឡើយ”។

លោកស្រី​​បន្ត​ថា ជនសង្ស័យ​ម្នាក់​ទៀត​ក៏​ត្រូវ​បាន​ចាប់​ខ្លួន​ផង​ដែរ ដែល​ធ្វើឲ្យ​ចំនួន​មនុស្ស​ដែល​ត្រូវ​បាន​ឃុំ​ខ្លួន ពាក់ព័ន្ធ​ការ​ស្លាប់​នេះកើន​ដល់២៦នាក់។

ពេញមួយសប្តាហ៍នេះ អាជ្ញាធរបាននិងកំពុងជីកផ្នូររាក់ៗ នៅពាសពេញព្រៃ ដើម្បីស្វែងរកសព និងរុករកតាមតំបន់នោះ ដើម្បីរកអ្នកដែលនៅរស់រានមានជីវិត ខណៈមនុស្សរាប់រយនាក់នៅតែបាត់ខ្លួន។

គួរបញ្ជាក់ថា ការស្លាប់មនុស្សជាបន្តបន្ទាប់នេះ គឺដោយសារតែលោក Paul Mackenzie មេដឹកនាំសាសនាចក្រ Good News International បានបញ្ជាឲ្យអ្នកមានជំនឿលើគាត់ ត្រូវបង្អត់អាហារកូនៗនិងខ្លួនឯងរហូតដល់ស្លាប់ ដូច្នេះពួកគេអាចឡើងឋានសួគ៌ មុនពេលពិភពលោករលាយ៕

ប្រែសម្រួល៖ Vann Vann

ប្រភព៖ Reuters

ចុចអាន៖ ប៉ូលិសរកឃើញសាកសពមនុស្សជាច្រើន ស្លាប់ដោយសារងប់ងុលនឹងសាសនានៅ កេនយ៉ា