សសយក កោតសរសើរចំពោះការលះបង់របស់កីឡាករ កីឡាការិនីក្នុងព្រឹត្តការណ៍កីឡាស៊ីហ្គេម២០២៣នេះ

សហភាពសហព័ន្ធយុវជនកម្ពុជា បានកោតសរសើរ​ និងថ្លែងអំណរគុណដល់អត្តពលលិកជម្រើសជាតិកម្ពុជាទាំងអស់ ដែលបានខិតខំប្រឹងប្រែងហ្វឹកហាត់ ហាត់សម ទាំងមុនការប្រកួត និងកំឡុងការប្រកួតតំណាងជាតិកម្ពុជានៅក្នុងព្រឹត្តិការណ៍ស៊ីហ្គេមឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈទំព័រហ្វេសប៊ុករបស់ខ្លួននៅព្រឹកថ្ងៃអង្គារនេះ សហភាពសហព័ន្ធយុវជនកម្ពុជា ក៏បានលើកទឹកចិត្តដល់អត្តពលិក​​ជម្រើសជាតិកម្ពុជាទាំងអស់ដោយបានលើកឡើងថា​ ការប្រកួតតែងមានឈ្នះ មានចាញ់ ប៉ុន្តែ កីឡាករ កីឡាការិនីកម្ពុជា តែងតែព្យាយាមយកជ័យជន្នះជូនកម្ពុជា ពុះពារ ខិតខំប្រឹងប្រែងពង្រឹងស្មារតី អភិវឌ្ឍសមត្ថភាព ដោយមិនបោះបង់ក្តីស្រមៃ និងក្តីសង្ឃឹមក្នុងការកសាងកិត្តិនាមជូនប្រទេសជាតិឡើយ។

យ៉ាងណាមិញ ចំពោះកិច្ចខំប្រឹងប្រែង និងការលះបង់ប្រកបដោយស្មាតីអង់អាចរបស់កីឡាករ កីឡាការិនី បានសរបញ្ជាក់យ៉ាងច្បាស់ពីឆន្ទៈដ៏មោះមុត សាមគ្គីភាពក្នុងស្មារតីជាខ្មែរតែមួយ ក្នុងការដណ្តើមជ័យជន្នះជូនជាតិមាតុភូមិ ក៏ដូចជាបង្ហាញកិត្យានុភាពជាតិ ឲ្យពិភពលោកបានស្គាល់នូវការលេចមុខមាត់ថ្មីរបស់កម្ពុជា ក្រោមការអភិវឌ្ឍ និងសុខសន្តិភាព។ លើសពីនេះថែមទៀត អាកប្បកិរិយារបស់អត្ថពលិកកម្ពុជា បានបង្ហាញពីភាពថ្លៃថ្លូរនៃអរិយធម៌ និងវប្បធម៌ដ៏ត្រចេះត្រចង់របស់កម្ពុជា តាមរយៈការចែករំលែកក្តីស្រឡាញ់ ការយកអាសារ យល់ទុក្ខធុរៈ ការយោគយល់អធ្យាស្រ័យ និងការគោរពចំពោះជាតិសាសន៏ដទៃកំឡុងពេលប្រកួត។ នេះបើតាមសហភាពសហព័ន្ធយុវជនកម្ពុជា។

គួរបញ្ជាក់ថា នៅក្នុងការប្រកួតកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ កម្ពុជាទទួលបានមេដាយសរុបចំនួន ២៥២គ្រឿងក្នុងនោះ មាស៧០​គ្រឿង ប្រាក់៦៨​គ្រឿង និងសំរិទ្ធ១១៣គ្រឿង។ នេះបើគិតត្រឹមព្រឹកថ្ងៃទី១៦ ខែឧសភា ឆ្នាំ២០២៣ ៕