អង់គ្លេស ​ថែមទណ្ឌកម្មថ្មី ហាមនាំចូលត្បូងពេជ្រពី រុស្ស៊ី

ចក្រភព​អង់គ្លេស​បាន​ប្រកាស​ហាម​ឃាត់​ការ​នាំ​ចូល​ត្បូង​ពេជ្រ​ និង​លោហៈ​ច្រើន​ប្រភេទពីរុស្ស៊ី ព្រម​ទាំង​ដាក់​ទណ្ឌកម្ម​បន្ថែម​លើ​មនុស្ស ៨៦ នាក់ និង​ក្រុមហ៊ុន​ដែល​ត្រូវ​បាន​ចោទ​ថា ​មាន​ទំនាក់​ទំនង​ទៅ​នឹង​ឧស្សាហកម្ម​យោធារបស់​ក្រុង​មូស្គូផងដែរ ។

ការិយាល័យលោកនាយករដ្ឋមន្ត្រី Rishi Sunak បានគូសបញ្ជាក់ពីវិធានការនេះនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ ដោយសង្ឃឹមថា ការរឹតបន្តឹងថ្មីនឹងកាត់បន្ថយពាណិជ្ជកម្មពេជ្រតម្លៃរាប់ពាន់លានដុល្លាររបស់រុស្ស៊ី និងការនាំចេញជាច្រើនផ្សេងទៀត រួមទាំងទង់ដែង អាលុយមីញ៉ូម និងសារធាតុនីកែលផងដែរ ។

ទណ្ឌកម្មថ្មីនេះ ត្រូវបានប្រកាសក្នុងកិច្ចប្រជុំកំពូល G7 នៅទីក្រុងហ៊ីរ៉ូស៊ីម៉ា ប្រទេសជប៉ុននៅថ្ងៃសុក្រនេះ ខណៈលោក Sunak និយាយថា ទណ្ឌកម្មនេះបង្ហាញពីក្រុមប្រទេស G7 គឺនៅតែរួបរួមក្នុងការប្រឈមមុខនឹងការគម្រាមកំហែងពីរុស្ស៊ី ក៏ដូចជាផ្តល់ការគាំទ្រដល់អ៊ុយក្រែន ។

ចាប់តាំងពីរុស្ស៊ីវាយលុកលើអ៊ុយក្រែនមក​ រដ្ឋាភិបាលអង់គ្លេសបានចុះក្នុងបញ្ជីខ្មៅនូវបុគ្គល និងអង្គភាពជាង ១,៥០០ ដោយបានបង្កកទ្រព្យសម្បត្តិរបស់រុស្ស៊ីជាង ២២​ ពាន់លានដុល្លារ និងដាក់កម្រិតលើពាណិជ្ជកម្មទ្វេភាគីជាង ២៤ ពាន់លានដុល្លារ ៕

ប្រែសម្រួល ៖ នាង រតនៈ

ប្រភព ៖​ RT

ចុចអាន ៖ អ៊ុយក្រែន ដាច់ខាតមិនទទួលយកសំណើសន្តិភាពដោះដូរនឹងការប្រគល់ ទឹកដីឲ្យ រុស្ស៊ី ឡើយ